नारायणगढ–मुग्लिन सडक विस्तारः लागत बढाउन भित्रभित्रै चलखेल

निर्माण अवधि १ वर्ष समय थपिँदा ४३ करोड खर्च बढ्ने
निर्माण सञ्चार, काठमाडौँ । विभिन्न बहानामा समय लम्ब्याउँदै नारायणगढ–मुग्लिन सडक विस्तारको लागत बढाउने चलखेलमा ठेकेदार कम्पनी ।

तोकिएको समयभन्दा निर्माण अवधि १ वर्ष ढिला हुनासाथ कम्तिमा रु ४३ करोड बढ्ने भएको छ । एक वर्षभन्दा बढी समय थपिनु, निर्माण सुरु हुनुभन्दा दुई वर्षअघिको लागत अनुमानअनुसार बोलपत्र गरिनु, कामका क्रममा कतिपय अत्यावश्यक काम थपिएपछि लागत मूल्य बढेको हो ।

विसं २०७२ वैशाखमा दुई वर्षमा सम्पन्न गर्ने गरी करिब दुई अर्ब ८९ करोडमा तिन ठेकेदार कम्पनीलाई ठेक्का दिइएको थियो ।

विभिन्न काममा हालसम्म करिब २७ करोड ७५ लाख खर्च भइसकेको छ । नारायणगढ–मुग्लिन सडक आयोजनाका परामर्शदाता कम्पनीका आवासीय इञ्जिनियर पुष्कर रेग्मीका अनुसार पहिलो खण्डको ठेक्का करिब ६० करोड ६१ लाख रहेकामा बढेर करिब ६८ करोड ९७ लाख पुगेको छ ।

त्यस्तै दोस्रो खण्डमा ठेक्का लगाउँदाको रकम करिब ९७ करोड ६७ लाख रहेकामा बढेर करिब एक अर्ब १० करोड पुगेको छ । तेस्रो खण्डको करिब एक अर्ब ३० करोडमा ठेक्का लगाइएकामा बढेर करिब एक अर्ब ४१ करोड पुगेको छ ।

पहिलो खण्डमा १३.८१, दोस्रो खण्डमा १२.७२ र तेस्रो खण्डमा ८.२२ प्रतिशत बढिसकेको छ । रेग्मीका अनुसार थपिएको भित्तो कटाइ, पहिरो पन्छाइ, पहिराका कारण पर्खाल लगाउँदा, बोलपत्रभन्दा स्तरीय नाली बनाउँदा, कालोपत्र थप फराकिलो बनाउनेजस्ता काममा खर्च थपिएको हो ।

सडक आयोजनाका निमित्त प्रमुख गोविन्द खनालका अनुसार मूल्य वृद्धिको रकम समावेश गर्न बाँकी छ । खनालले भने, ‘मुद्रास्फीति दरका आधारमा लागत बढ्छ । यसका अतिरिक्त वायो इञ्जिनियरिङका कतिपय काम बोलपत्रमा समावेश नभएकाले ती कामसहित आरसिसी रिटेनिङ वाल, सडकमाथिका डाँडाबाट झरेको पानी भित्तोमा कुलो बनाएर व्यवस्थापन गर्नेजस्ता कामका लागि करीव रु २६ करोड १३ लाख लागत अनुमान भएको छ ।’

उनले थपे, ‘काम गरिरहेका ठेकेदारले सो रकममा छुटेका काम गर्न नसकिने जनाएपछि छुट्टै ठेक्का लगाएर काम गरिँदैन । वर्षामा बाढीअघि नै गर्नुपर्ने कतिपय महत्वपूर्ण काम भएकाले ती काम आउँदो सातादेखि कामदार लगाएर गर्ने तयारीसमेत गरिँदैछ ।’

परामर्शदाता कम्पनी इञ्जिनीयर रेग्मीले सकेसम्म १५ प्रतिशत मात्र लागत मूल्यवृद्धि हुने गरी काम सक्ने र केही छुटपुट काम भएपछि गर्ने तयारी भइरहेको बताए ।

यसबाट लागत मूल्य करिब रु ४३ करोड ३१ लाख बढ्छ । निर्माण सम्पन्न गरिसक्ने मिति पहिलो खण्डलाई चैत ९, दोस्रो खण्डलाई चैत १९ र तेस्रो खण्डलाई चैत २९ सम्म तोकिएको छ ।

 

रासस

...

शनिबार १०, चैत्र ०७४

प्रतिक्रिया

Related