संसदीय समितिको ठहरः ‘सिक्टा’मा ठेकेदारको चरम लापरवाही, आयोजनाको अवस्था लाजमर्दो

‘डिजाइन भन्दा फरक रुपमा संरचना तयार’
निर्माण सञ्चार, कर्णाली प्रदेश । संसदीय समितिले सिक्टा सिँचाई आयोजनाको स्थलगत अनुगमन गरेको छ ।

अनुगमनपछि संसदीय समितिले उक्त आयोजनामा निर्माण व्यवसायी कालिका कन्स्ट्रक्सनको बदमासी रहेको दाबी गरेको छ । ठेकेदारका कारण आयोजनाको अवस्था लाजमर्दो भएको समितिले बतायो ।

त्यस कम्पनीलाई कानुनी कारवाहीको दायरामा ल्याउन समितिले निर्देशन दिएको छ ।

प्रतिनिधिसभा, कृषि, सहकारी तथा प्राकृतिक स्रोत समितिको टोलीले बाँकेस्थित राष्ट्रिय गौरवको सिक्टा सिँचाइ आयोजनाको स्थलगत अनुगमन तथा निरीक्षण गरेको हो ।

समिति विगत ३ दिनदेखि नियमित रुपमा स्थलगत अनुगमनमा रहेको छ ।

नहर परीक्षणका क्रममा पटक–पटक भत्किएपछि समितिका सभापति पूर्णाकुमारी सुवेदी नेतृत्वको टोलीले ३ दिन सिक्टा सिँचाइ राष्ट्रिय राष्ट्रिय गौरवको यो आयोजनाको मूलबाँध तथा मूलनहरको स्थलगत अनुगमन गरी समितिले जानकारी लिएको छ ।

स्थानीयसँग समेत उक्त अन्तरक्रिया गरेको छ ।

स्थानीयबासीले संसदीय समितिलाई निर्माण व्यवसायीले गुणस्तरहिन निर्माण सामग्री प्रयोग गरेको, आयोजनाका कर्मचारी समेत ठेकेदारसँग मिलेकोलगायतका गुनासो गरेका थिए ।

स्थानीयले डिजाइन भन्दा फरक रुपमा संरचना तयार पारेको भन्दै निर्माण कम्पनीलाई तत्काल कडा कारवाही गर्न माग गरेका छन् । कालिका कन्स्ट्रक्सन राप्रपाका नेता एवम् पूर्वमन्त्री विक्रम पाण्डेको कम्पनी हो ।

यो कम्पनीले देशका अन्य स्थानमा निर्माण गरेको भौतिक संरचनामा समेत समस्या देखिएको छ ।

स्थलगत अनुगमन टोलीमा सांसद सत्यनारायण शर्मा खनाल, राजबहादुर बुढा क्षेत्री, शान्तिमाया तामाङ पाख्रीन र शान्ता चौधरी उपस्थित थिए ।

सिक्टा आयोजनाको अनुगमनमा टोलीसँगै बाँकेका सांसद महेश्वर गहतराज, पूर्वसांसद देवराज भार, प्रदेशसभा सदस्य आईपी खरेल र कृष्णा केसीलगायतको पनि सहभागी थियो ।

अख्तियार दुरुपयोग अनुसन्धान आयोगले समेत छानबिन गरेकाले दोषीलाई कडा कारवाही गराउने वातावरण सृजना गर्न समेत समितिले अनुरोध गरेको छ ।

...

शुक्रबार, २६ असोज २०७५ 

प्रतिक्रिया

Related