अत्याधुनिक हेभी औजारको प्रयोगले मात्र नेपालको निर्माण र विकासलाई गति दिन सक्छ– गगन तिरुवा

युनिक कस्ट्रक्सन अत्याधुनिक औजार बिक्री मात्र हैन, सञ्चालनको सेवा पनि दिन्छ, नेपालको तीव्र विकासका लागि भूमिका खेल्न चाहन्छ
निर्माण सञ्चार, काठमाडौं पछिल्ला दिनमा नेपालमा पूर्वाधार विकास र निर्माण कार्यले तीव्र गति लिदै छ । योसँगै निर्माण क्षेत्रमा आवश्यक विभिन्न उपकरण पनि भित्रिने क्रम बढ्दो छ ।

आधुनिक निर्माण उपकरणको प्रयोगबाट अत्याधुनिक भवन निर्माण गर्न, हाई स्टेन्डर सडकहरु, हाइवे तथा पुलहरु निर्माण गर्न पनि छिटो हुने, खर्चमा पनि किफायति, वैज्ञानिक ढंगको संरचना र निर्माण कार्य पनि टिकाउ हुनेमा कुनै दुई मत छैन ।

किनकि परम्परागत रुपले काम गर्ने युग अब समाप्त भइसकेको छ ।

गुणस्तरीय र दीर्घकालीन निर्माणको अभावमा २०७२ वैशाखको भूकम्पबाट भवनहरु भत्केको हामीले देखेकै हौं । निर्वाचन लगत्तै मुलुकले १० ओटा औद्योगिक सहर बनाउने काम सक्नेवाला छ ।

हुलाकी रजामार्गदेखि मध्यपहाडी लोकमार्ग पनि बन्दै छन् । हाइड्रो पावर क्षेत्रमा पनि हेभी औजारको आवश्यकता बढिरहेको छ ।

अबका दिनमा हरेक नगरपालिकाले आफ्नै तरिकाले सहरीकरण र विकास गर्नेवाला छन् । गाउँ गाउँमा विकासको नयाँ लहर नै आउनेवाला छ ।

यस्तो बेलामा अत्याधुनिक निर्माण औजारहरुको आवश्यकता अझै बढ्नेवाला छ । र, सोही अनुसारका सिकर्मी, डकर्मी र तालिम प्राप्त जनशक्तिको पनि नेपालमा ठुलो संख्यामा आवश्यकता बढ्न जाने छ ।

यस कुरालाई ध्यान दिने कस्ले ?

सरकारले भन्दा पनि बरु निजी क्षेत्रले व्यावसायिक रुपमै भने पनि आ–आफ्नो स्थानबाट नेपालमा नयाँ नयाँ हेभी औजारहरु भित्राइ रहेका छन् ।

निर्माण क्षेत्रमा पनि नयाँ किसिमका औजार र नयाँ किसिमको सीप र जनशक्ति लगानी भइरहेको अवस्था छ । तैपनि नेपालमा पर्याप्त मात्रामा निर्माण उपकरण छैनन् ।

र, कतिपय ठाउँमा भएका अत्याधुनिक उपकरणहरुको प्रयोग गर्न पनि हुन सकेको पाइन्न किन ? यसको कारण के हो ? कि निर्माण औजारको महत्त्व नजानेर हो ?

महत्त्व कम भएर भन्दा पनि यसको प्रयोगबारे ज्ञान नहुँदा निर्माण व्यवसायीले समेत यस्ता औजारहरुको प्रयोग नगरेको बुझाइ छ युवा उद्यमी गगन तिरुवाको ।

युनिक कन्स्ट्रक्सन प्रा.लि. का प्रबन्ध निर्देशक तिरुवा यही कन्स्ट्रक्सनबाट विगत ४ वर्षदेखि अत्याधुनिक निर्माण औजार बिक्री वितरण गर्दै आइरहेका छन् ।

युनिक कन्स्ट्रक्सन नेपालको निर्माण औजार बजारमा फरक ब्रान्ड हो, किनकि यसले फरक तरिकाले काम गर्ने गर्छ ।

हेभी औजार सञ्चालन गर्न, ठुल्ठूला भवनमा आरएमसीको प्रयोग जस्ता विषयमा यसले परामर्श तथा प्रयोगमूलक सीप सिकाउने काम पनि गर्ने व्यवसायी तिरुवा बताउँछन् ।

हातमा सीप हुँदा विदेश र स्वदेशमै पनि युवाहरु बिक्न सक्छन् भन्ने कुरा उनको कामबाट मानिस सिक्न सक्छ ।

युनिक कन्स्ट्रक्सन प्रा.लिले आफ्नो ब्रान्डका ग्राहकहरुलाई दिने सेवा सुविधा र निर्माण औजार र यसको नेपाली बजारका बारेमा निर्माण सञ्चारसँग राखेको धारणा यहाँ प्रस्तुत गरिएको छ--

एउटा युवा, अरु पनि त अवसर थिए होलान्, तर निर्माण क्षेत्रको उपकरण विक्रेता बन्नु भएको छ, कसरी आउनुभो यो क्षेत्रमा ?

जन्मले म नेपाली हुँ । तर मैले शिक्षादीक्षा भने भारतमा गरें । म पेशाले मेकानिकल इन्जिनियर हुँ । मैले मेरो करिअरको सुरुवाती चरणमा भारतको टाटा इन्टरनेसनलको कन्स्ट्रक्टिभ इक्विप्मेन्ट डिभिजनमा रहेर सर्भिस इन्जिनियरको रुपमा काम गरें ।

त्यसपछि केही समय कङक्रिट मेसिनको सेल्स डिभिजनमा पनि काम गरें । त्यसपछि म नेपालमा आएँ र केही समय मैले नेपालमा नाम चलेका निर्माण उपकरण विक्रेता कम्पनीमा प्रबन्धकका रुपमा काम गरें ।

सन् २०१३ मा हामी तीन जना साथीहरु मिलेर कंक्रिट मेसिनका लागि सेवा प्रदायक कम्पनीका रुपमा युनिक कन्स्ट्रक्सन लिएर नेपाली मार्केटमा उदायौं ।

किन हेभी औजार व्यवसायमै हात हाल्नु भयो त ?

कनकि मेरो पढाइ मेकानिकल इन्जिनियरमा थियो ।

मैले काम गरेको अनुभवले पनि मलाई यही क्षेत्रमा हात हाल्न प्रेरित गर्यो । यो क्षेत्रमै किन हात हालियो त भन्दा, नेपाली मार्केट उदाउँदा बजार हो ।

भूकम्प अघि पनि नेपाली बजारमा यसको काम गरेको अनुभव मसँग थियो । भूकम्प पछि पुनर्निर्माणको चरणमा नेपाल नै प्रवेश गरेको छ । यसले पनि अवसरहरु सिर्जना गरेको अवस्था हो ।

अबका दिनमा पनि नेपालको विकासको काम त धेरै बाँकी छ । यी सबै कुरा हेर्दा यसको बजारमा केही नयाँ काम गर्नु पर्छ भन्ने मलाई लागेकाले पनि यो क्षेत्रमा हात हालेको हुँ ।

कस्तो नयाँ कुरा तपाईहरुले गर्नु भयो त ?

एकदमै ठिक प्रश्न गर्नुभयो । हामीले के नयाँ गरयौं भने, अरुले बिक्री र व्यापार मात्र गरे । तर, हामीले सेवामा पनि ध्यान दिन थाल्यौं । हामीले पनि कंक्रिट इक्वीप्मेन्ट नै बिक्री गरेका हौं । तिनमा ब्याचिङ प्लान्ट, मिक्सचर र कंक्रिट पम्प जस्ता इक्वीप्मेन्ट पर्छन् ।

तर नेपालमा अत्याधुनिक यस्ता निर्माण औजारबारे निर्माण व्यवसायी नै सचेत छैनन् ।

घर बनाउनेदेखि हाउजिङहरु बनाउन पनि चाहिने यस्ता मेसिनको सेवा हामीले सुरु गर्यौं । हामीले यसबारे मानिसलाई आवश्यकता सिकायौं र चलाउने कसरी भन्ने पनि सेवा दिन थाल्यौं । यही नै हामीले गरेको नयाँ काम हो ।

नेपालमा कंक्रिट इक्वीप्मेन्टको अवस्था कस्तो छ त ?

अहिलेसम्मको अवस्थालाई हेर्दा यहाँको निर्माण क्षेत्रमा अत्यन्त न्यून मात्रामा कंक्रिट इक्वीप्मेन्ट प्रयोग भएको पाइन्छ । यसले गर्दा पनि निर्माण कार्य दिगो बन्न सकेका छैनन् ।

बनेका संरचनामा पनि अधिक खर्च भएको छ ।

०७२ वैशाखमा गएका भूकम्प पछिको पुनर्निर्माणको गति हेर्दा पनि पुनःनिर्माणको क्षेत्रमा समेत यस खाले औजारको प्रयोग हुन सकेको देखिदैन ।

भूकम्पले बिग्रेका अधिकांश संरचना परम्परागत ढंगले नै बनिरहेको देख्दा नेपाल बन्ने कहिले होला जस्तो लाग्छ ।

जबकि यस्ता औजारको प्रयोगले काम वैज्ञानिक, बलियो र छिटो हुन्छ भन्ने मानिसहरुमा चेतना विकास नै भएको छैन । विस्तारै विस्तारै बुझ्ने क्रम भने बढेको छ ।

युनिक कन्स्ट्रक्सनले कस्तो सेवा दिँदै आएको छ त ? युनिक कन्स्ट्रक्सनले सुरुका दिनदेखि नै बिक्री मात्रै गरेको छैन ।

बिक्री पछिको सेवा सुविधा पनि हाम्रो प्राथमिकतामा पर्ने गरेको छ । कुनै निर्माण व्यवसायीले मेसीनको खरिदसँगै बिक्री पछिको सेवालाई पनि ध्यान दिनुपर्ने हुन्छ ।

त्यसैले निर्माण व्यवसायीलाई बिक्री पछिको सेवामा सहज होस् भन्नका लागि हामीले १७ जना सर्भिस इन्जिनियरलाई निरन्तर सेवामा लगाइ रहेका छौं ।

युनिक कन्स्ट्रक्सन पुद्ज्मेस्टर्स मेसीनको आधिकारिक बिक्रेता हो । यो जर्मन कम्पनी हो र विश्वकै नं १ कंक्रिट कम्पनी हो ।

यस्तो कम्पनीसँग सहकार्य गरेर नेपालमा काम गर्न पाउँदा अत्यन्त खुसी लागेको छ । यतिबेला युनिक कन्स्ट्रक्सनले कंक्रिट मेसीन भित्र्याउने र नेपाली निर्माण व्यवसायीसम्म पुर्याउने काम गरिरहेको छ ।

कम जनशक्तिमा बढी काम कसरी गर्ने भन्ने कुराको परामर्श सेवा पनि युनिक कन्स्ट्रक्सनले दिन्छ । र, कंक्रिट मेसीन संचालनका लागि आवश्यक तालिमको निःशुल्क सेवा पनि दिने गरेका छौं ।

निर्माण व्यवसायी र आमउपभोक्तालाई तपाईको सुझाव के छ ?

नेपालमा केही निर्माण व्यवसायीले कंक्रिट मेसीनको प्रयोग गरे पनि धेरै निर्माण व्यवसायीहरु निर्माण उपकरणका बारेमा त्यति जानकार हुनुहुन्न । नेपालमा आरएमसी मेसीन पनि आइरहेको छ जसले रेडीमेड घर ढलान गर्न सक्छ ।

यसका लागि युनिक कन्स्ट्रक्सन मात्र एक कम्पनी हो जसले आरएमसी ढलानका लागि आवश्यक तालिम लगायत अन्य प्याकेजमा समेत निःशुल्क सेवा दिन्छ ।

यस्ता अत्याधुनिक निर्माण उपकरणका बारेमा निर्माण व्यवसायी तथा आम उपभोक्तामा समेत जानकारीको अभाव छ ।

त्यसैले सरकार लगायत निर्माण क्षेत्रमा कार्यरत विभिन्न सेवा प्रदायक कम्पनीले निर्माण उपकरणका बारेमा जनचेतना ल्याउन जरुरी छ ।

त्यसका लागि स्थानीय स्तरमा निर्वाचित जनप्रतिनिधिदेखि आम जनतामा पनि निर्माण उपकरणको महत्त्वको बारेमा जानकारी गराउन अत्यन्त जरुरी छ । यस क्षेत्रमा निर्माण मिडिया जस्ता सञ्चार माध्यमले पनि भूमिका खेल्नु पर्ने मैले देखेको छु ।

नयाँ ब्रान्चबारे केही कुरा छन् कि !

हामी तिहारपछि लगत्तै पोखरामा नयाँ ब्रान्च खोल्दै छौं । यसले पोखरा जस्तो पर्यटकीय नगरीमा बन्दै गरेको अन्तर्राष्ट्रिय विमानस्थल, महानगरका लागि चाहिने सहरीकरणको विकास, बाटो र सडक निर्माणमा थप टेवा दिन्छ भन्ने आशा गर्न सकिन्छ ।

पोखरा सहरका लागि युनिक कन्स्ट्रक्सनले दिने योगदान साँच्चिकै महत्त्वपूर्ण हुने मैले देखेको छु ।

 

...

बिहीबार, १९ असोज २०७४

 

प्रतिक्रिया

Related