गल्छी–त्रिशूली सडक तीन महिनाका लागि आंशिक बन्द

निर्माण सञ्चार, काठमाडौँ | आज (शनिबार)देखि गल्छी–त्रिशूली–मैलुङ सडक योजनाको कामलाई तीव्रता दिनका लागि गल्छी–त्रिशूली सडकखण्डको गल्छीदेखि पीपलटारसम्मको खण्डमा दैनिक आठ घण्टा सडक बन्द हुने भएको छ ।

गल्छी–त्रिशूली–मैलुङ–स्याफ्रुबेँसी–रसुवागढी सडक योजनाले सडक स्तरोन्नतिको कामलाई तीव्रता दिनका लागि बन्द गर्न लागिएको हो ।

सो सडक ३ महिनाका लागि आंशिक बन्द गरी निर्माण अघि बढाउने प्रअिजको अध्यक्षतामा आज बसेको सरोकार भएकाहरुको बैठकले निर्णय गरेको छ ।

योजनाको निर्माण अपेक्षित रुपमा गति लिन नसकेको र हाल अप्ठ्यारा भीर काट्ने कामको शुरुआत हुन लागेकाले सडक बन्द गरिएको योजना प्रमुख देवकोटाले जानकारी दिए ।

उनका अनुसार धादिङको गल्छीदेखि रसुवाको स्याफ्रुबेँसीसम्म ८२ किमी सडकमध्ये ४६ किमी क्षेत्रमा स्तरोन्नतिको काम भइरहेको छ ।

नौ अर्ब लगानी रहेको योजनाअन्तर्गत सडकको दायाँबायाँ पर्खाल लगाउने र सडक विस्तारको काम भइरहेको छ ।

उत्तर–दक्षिण(चीन र भारत) जोड्ने छोटो नाकाका रुपमा रहेको यो सडक विस्तारलाई अझै प्रभावकारी रुपमा अघि बढाउन पुस १ गतेदेखि फागुन मसान्तसम्म बिहान ६ देखि ९ बजेसम्म र बिहान ११ देखि अपराह्न ४ बजेसम्म पीपलटारदेखि गल्छीसम्म बाटो पूर्णरुपमा बन्द हुने बताइएको छ ।

उक्त योजना विसं २०७३ वैशाख २५ मा २७ महिनाभित्र काम सम्पन्न गर्ने गरी काम शुरु भएको थियो । तर, जग्गा अधिग्रहण, बिजुलीका खम्बा र वन क्षेत्रका कारण निर्माणमा ढिलाइ भइरहेको देवकोटाको भनाइ छ ।

...

शनिबार, १ पुष ०७४ 

प्रतिक्रिया

Related