नेपाली समय: १०:५५:०३ बिहान
वि.सं २०७६ मंसिर २९   आइतबार

करोडौं लगानीमा खुले नयाँ उद्योग, ‘जुत्तादेखि प्लाइउडसम्मका कारखाना’

निर्माण सञ्चार, २६ साउन, काठमाडौं । पछिल्लो समय राजनीतिक उतार चढावका कारण नयाँ उद्योग खुल्ने र त्यसको केही समयपछि विविध कारणले बन्द हुने क्रम नरोकिएपछि उद्योगी तथा व्यवसायीहरु निराश भएका थिए। तर स्थिर सरकार आएपछि पछिल्लो एक वर्षदेखि उद्योग स्थापना हुने क्रम ह्वात्तै बढेको छ। व्यापारिक नाकाको रूपमा परिचित झापा जिल्लामा अहिले थरी थरीका उद्योगहरु स्थापना भइरहेका छन्। झापाको मेचीनगर केही वर्षयता औद्योगिक क्षेत्रको रुपमा चिनिन थालेको छ।

विकासका पूर्वाधार पुगेकोले सो ठाउँमा अहिले धमाधम उद्योगहरु स्थापना भइरहेका छन् । जसले गर्दा उक्त क्षेत्रको विकासमा स्थानीयदेखि संघीय सरकारले चासो देखाएको छ। 

उद्योगको लागि आवश्यक पर्ने यातायात र बैंकिङ सुविधा तथा कच्चा पदार्थको आयात पनि यहाँ सजिलै हुने गरेको छ। सहजता र सुरक्षित लगानीको वातावरणले मेचीनगरको ज्यामिरगढी र दुहागढी क्षेत्रमा करोडौं लगानीका नयाँ उद्योगहरू धमाधम स्थापना भइरहेका छन् । 

उद्योग स्थापनाले मेचीनगर क्षेत्रको मुहार नै फेरिएको छ। भने त्यहाँ आर्थिक वृद्धि दर पनि बढ्दै गइरहेको छ। उद्योगहरू स्थापना भएसँगै स्थानीयले रोजगारी पाउने क्रम र व्यापारिक चहलपहल बढ्दा यहाँका जनता खुसी भएका छन्।

मेची उद्योग वाणिज्य सङ्घका अध्यक्ष ऋषि तिम्सिनाले सुरक्षित लगानीको वातावरण बनेपछि मेचीनगरमा उद्योगी व्यवसायीहरू आकर्षित भइरहेको बताए। उनका अनुसार भारतबाट कच्चा पदार्थ आयात गर्न भन्सार विन्दु नजिक हुनु र मुलुकभित्र लगानी सुरक्षाको वातावरण सिर्जना हुनुले मेचीनगर औद्योगिक ‘हब’को रूपमा विकसित भइरहेको छ ।

अहिले यस क्षेत्रमा चाउचाउ, जुस, पानी, दाना, जुत्ता चप्पल, लुब्रिकेन्ट्स र प्लाईउडका कारखाना लगायतका उद्योगहरू खुलिरहेका छन्। सोही क्रममा मेचीनगर वडा नं. १३ दुहागढीमा मनषा थाईफुड्स प्रालिले तयारी चाउचाउको उत्पादन सुरु गरेको छ । उद्योगमा ५० जनाभन्दा बढी स्थानीयले प्रत्यक्ष रोजगारीको अवसर पाएको सञ्चालक बुद्धि घिमिरे बताउँछछन् । उनका अनुसार  दुई सय करोड लगानीमा उद्योग स्थापना गरिएको हो। 

त्यस्तै उक्त क्षेत्रमा दर्जनभन्दा बढी प्लाईउडका कारखाना पनि सञ्चालनमा छन्।कर्मचारी र कामदार गरी हरेक प्लाइउड कारखानामा सय जना भन्दा बढीले प्रत्यक्ष रोजगारी पाएका छन् ।  सञ्जीवनी, सिद्धार्थ लगायतका प्लाइउड कारखाना ठूलो लगानीमा खुलेका हुन् । पूर्वमै सबैभन्दा बढी सिमेन्ट उद्योग मेचीनगरमै सञ्चालनमा रहेका छन् । 

हिमालयाज, सनराइज, मेगा र गोरखकाली उद्योगबाट उत्पादित गुणस्तरीय सिमेन्टले प्रदेश नं. १ को ठूलो माग धान्दै आएको छ । सिमेन्ट उद्योगहरूमा करिबव पाँच सयले प्रत्यक्ष रोजगारी पाएका छन् । कतिपय प्राविधिक कामदार भारतबाट आउने गरे तपनि पछिल्लो समयमा उद्योगले स्वदेशी कामदारलाई नै प्राथमिकता दिने गरेका छन् ।

सनराइज र हिमालयाज सिमेन्ट उद्योगका महाप्रबन्धक अमित पोद्दारका अनुसार सनराइजले वार्षिक डेढ लाख र हिमालयाजले ७५ हजार मेट्रिक टन सिमेन्ट उत्पादन गर्दै आएको छ । ती दुबै उद्योगमा १६० स्वदेशी कामदारले प्रत्यक्ष रोजगारी पाएका छन् ।

त्यस्तै पशु र पंक्षीको आहाराको रूपमा दाना उत्पादन गर्ने उद्योगहरू पनि मेचीनगरमा खुल्ने क्रम बढेको छ । भ्याली एग्रो फिड्स प्रालि नामक दाना उद्योग मेचीनगर–१३ मा ४५ करोड रुपैयाँको लगानीमा तीन महिना अघि स्थापना भएर आफ्नो उत्पादनलाई बजारमा पुर्‍याउन थालिसकेको छ । उद्योगले कुखुरापालन गर्नुका साथै अण्डा र चल्ला उत्पादनसमेत गर्दै आएको छ ।

उद्योगका सञ्चालक सुबोध निरौलाले गाईभैँसी, सुँगुरबङ्गुर र कुखुराका लागि आवश्यक पर्ने दाना प्रति घण्टा १० मेट्रिक टनका दरले उत्पादन भइरहेको जानकारी दिए । कुखुराको अण्डा र मासुमा नेपाल आत्मनिर्भर भइसकेको हुँदा भारतबाट कुखुरा र अण्डाको अवैध आयात रोक्न सबै लाग्नुपर्ने उनको भनाइ छ ।

मेचीनगर–१० मा दैनिक पाँच हजार जोडा जुत्ता उत्पादन गर्ने क्षमता भएको एसियन फुटवेयर प्रालि नामक कारखाना भर्खरै खुलेको छ । प्रालिका अध्यक्ष छवि पौडेलले रु। १० करोड लगानीमा उद्योग स्थापना गरिएको र ७५ जना स्थानीय कामदारले प्रत्यक्ष रोजगारी पाइरहेको जानकारी दिए ।

मेची उद्योग वाणिज्य सङ्घमा आर्थिक वर्ष २०७५/०७६ मा ३८४ वटा व्यावसायिक फर्म थपिएको छ ।  मेचीनगर भारत, भूटान र बङ्गलादेशसँग प्रत्यक्ष व्यापारिक सम्बन्ध भएको व्यापारिक नाका भएको हुँदा यहाँ पाँचतारे होटल र क्यासिनो खुल्ने क्रम चलिरहेको छ । मेचीनगर–७ मा मेची क्राउन नामक पाँचतारे होटलको निर्माण अन्तिम चरणमा रहेको छ।

काँकरभिट्टा, धुलाबारी, चारआली लगायतका बजारमा सनराइज, कन्काई, एक्सेल, प्रभु, एनआइसी एसिया, माछापुच्छ्रे, सिद्घाथर्, ग्लोबल आइएमई लगायतका बैङ्कका शाखा छन् । बैंकहरूले उद्योगमा लगानी प्रवद्र्धन गरिरहेका छन् ।



प्रकाशित: २०७६ साउन २६
August 11th 2019

निर्माण सञ्चार

निर्माण सञ्चार : पुनःनिर्माण एवं प्रकोप चेतना विस्तारको पहरेदार