नेपाली समय: ०६:४८:०० बिहान
वि.सं २०७६ भाद्र ३०   सोमवार

अन्तर्राष्ट्रिय मापदण्डअनुसार पोखरामा ‘स्पोर्टस क्यासल’

निर्माण सञ्चार, १४ भदौ, काठमाडौं । पोखरामा अन्तर्राष्ट्रिय मापदण्डअनुसार पोखरामा ‘स्पोर्टस क्यासल’ सञ्चालनमा आएको छ। पोखरा महानगरपालिका–४ रामकृष्णटोलमा साढे ६ रोपनी क्षेत्रफलमा फुटसल मैदान तथा व्यायामशाला सहितको ‘स्पोर्टस क्यासल’ सञ्चालनमा आएको हाे ।

पूर्वराष्ट्रिय फुटबल खेलाडी ईश्वर गुरुङलगायत छ जना खेल क्षेत्रमा सङ्लग्न युवाको समूहले सञ्चालनमा ल्याएको सो स्पोर्टस क्यासलको आज गण्डकी प्रदेशका कार्यवाहक मुख्यमन्त्री एवं आर्थिक मामिला तथा योजनामन्त्री किरण गुरुङले शुभारम्भ गरे।

फुटसल खेलको विकासमार्फत राष्ट्रिय खेलाडी उत्पादन गरी देशको खेल क्षेत्रमा योगदान गर्ने उद्देश्यले क्यासल सञ्चालनमा ल्याइएको सञ्चालक गुरुङले बताए । चन्द्रसहित अनमोल पालिखे, विजया गुरुङ, विष्णु गुरुङ, विशाल श्रेष्ठ, दिलीप कार्की र पवन गुरुङले छ करोड रुपियाँँ लगानीमा सो क्यासल सञ्चालनमा ल्याएका हुन्।

फुटसल मैदानमा सम्पूर्ण अन्तर्राष्ट्रिय मापदण्ड अनुसारका आवश्यक संरचना निर्माण गरिएको सञ्चालक अनमोल पालिखेले बताए । त्यसैगरी एकपटकमा ८० जनासम्मले अभ्यास गर्न मिल्ने गरी आधुनिक उपकरणसहितको व्यायामशाला रहेको उनको भनाइ थियो ।

निश्चित शुल्कमा व्यक्तिगत फुटसल प्रशिक्षणका लागि प्रशिक्षकको व्यवस्था गरिएको बताउँदै पालिखेले एकै थलोभित्र खेलकूद तथा व्यायाम गर्न सकिने उल्लेख गरे। मन्त्री गुरुङले शारीरिकरुपमा स्वस्थ हुन सके मानसिक रुपमा पनि तन्दुरुस्त हुने धारणा व्यक्त गर्दै सरकारी तथा निजी क्षेत्रको सहभागितामा देशलाई समृद्ध बनाइने स्पष्ट पारे।

प्रदेशसभा सदस्य विन्दुकुमार थापाले व्यक्तिगत अनुशासन तथा युवालाई कुलतमा फस्नबाट बचाउनसमेत खेलकूद अपरिहार्य रहेको भनाइ राखे । राष्ट्रिय खेलकूद परिषद्का सदस्य राजेश गुरुङ, नेपाल ह्याडबल सङ्घका केन्द्रीय अध्यक्ष तेजबहादुर गुरुङ लगायतले स्पोर्टस् क्यासल सञ्चालनसँगै खेलकूदको विकासमा टेवा पुग्ने बतए थिए ।



प्रकाशित: २०७६ भाद्र १४
August 31st 2019

निर्माण सञ्चार

निर्माण सञ्चार : पुनःनिर्माण एवं प्रकोप चेतना विस्तारको पहरेदार