नेपाली समय: ०१:०२:४५ अपरान्ह
वि.सं २०७६ भाद्र ३०   सोमवार

कर्णालीमा अक्सिजन प्लान्ट स्थापना, बिरामीलाई ठूलो राहत

निर्माण सञ्चार, १८ भदौ, कर्णाली प्रदेश ।  कर्णाली स्वास्थ्य विज्ञान प्रतिष्ठानले अक्सिजन प्लान्ट स्थापना गरेको छ। अक्सिजन प्लान्ट स्थापना भएपछि अक्सिजन प्रयोग गरी उपचार गर्नुपर्ने बिरामीका लागि ठुलो सुविधा भएको छ । अक्सिजन प्लान्टले हरेक दिन ७० वटा सिलिण्डरसम्म उत्पादन गर्नेछ भने विद्युत् आपूर्तिको समस्याले गर्दा तत्काल दैनिक कम्तीमा १० सिलिण्डर उत्पादन भइरहेको छ ।

अक्सिजन प्लान्टको कर्णाली प्रदेशका आन्तरिक मामिला तथा कानूनमन्त्री नरेश भण्डारीले उद्घाटन गर्दै भने, कर्णाली स्वास्थ्य विज्ञान प्रतिष्ठान कर्णाली प्रदेशकै गौरवको स्वास्थ्य विश्वविद्यालय भएकाले यसले कर्णालीका जनताको स्वास्थ्य शिक्षा, सेवा र अनुसन्धानमा नयाँ नयाँ पहलकदमी लिनुपर्नेछ ।

प्रतिष्ठानले इमर्जेन्सी सेवा, आइसियु सेवा, शल्यक्रिया सेवा, नेत्ररोग सेवा, हाडजोर्नी, दन्तरोग, छाला रोग, महिला तथा स्त्रीरोग, बालरोग, रेडियोलोजी, एक्सरे, ल्याब, पिछडिएको क्षेत्रमा हुम्ला, जुम्ला, मुगु, डोल्पा, कालीकोट, रुकुम, सुर्खेतमा विशेषज्ञ सेवा, अछाम, बझाङ, बाजुरामा घुम्ती स्वास्थ्य सेवा, सामुदायिक स्वास्थ्य सुरक्षा कार्यक्रम तथा फार्मेसी सेवा दिइरहेको छ । त्यस्तै प्रवीणता नर्सिङ, जनरल मेडिसिन, स्नातक मिडवाइफेरी नर्सिङ, पब्लिक हेल्थ पढाइ भइरहेको छ ।

हाल ३०० श्ययाको अस्पताल सञ्चालनमा रहेको कर्णाली स्वास्थ्य विज्ञान प्रतिष्ठान कर्णाली प्रदेशको मेडिकल टुरिजमको नयाँ गन्तव्य हुने देखिन्छ । कर्णाली स्वास्थ्य विज्ञान प्रतिष्ठान स्थापना भएयता जुम्लामा स्वास्थ्य सेवा, शिक्षा र अनुसन्धानका काम भइरहेका छन् ।



प्रकाशित: २०७६ भाद्र १८
September 4th 2019

निर्माण सञ्चार

निर्माण सञ्चार : पुनःनिर्माण एवं प्रकोप चेतना विस्तारको पहरेदार