नेपाली समय: ०९:५७:४६ राती
वि.सं २०७७ आश्विन ५   सोमवार

सार्वजनिक खरिद ऐन संशोधन प्रक्रियामा महासंघको सहभागिताका लागि एफक्यानको आग्रह

निर्माण सञ्चार, चैत्र ६, काठमाडौै । नेपाल निर्माण व्यवसायी महासंघ ‘एफक्यान’को एक प्रतिनिधिमण्डलले मंगलवार भौतिक पूर्वाधार तथा यातायात मन्त्री वसन्तकुमार नेम्बाङलाई भेटी सार्वजनिक खरिद ऐन संशोधन गर्ने क्रममा महासंघको अनिवार्य प्रतिनिधित्वको लागि आग्रह गरेको छ । 

महासंघ अध्यक्ष रवि सिंह नेतृत्वको प्रतिनिधिमण्डलले निर्माण व्यवसायसँग सम्बन्धित ऐन÷नियमहरु निर्माण व्यवसाय मैत्री तथा विकास निर्माण मैत्री नहुँदा विकास निर्माणको क्षेत्रमा देशले फड्को मार्न नसकेकोबारे मन्त्री नेम्बाङलाई जानकारी गराएको छ । 

महासंघको सुझाव बमोजिम सार्वजनिक खरिद ऐन, २०६३ परिमार्जन गर्ने कार्यमा महासंघको समेत अनिवार्य प्रतिनिधित्व गरी गराई पाउनका लागि सम्बन्धित निकायमा आवश्यक पहल गरी दिन प्रतिनिधिमण्डलले मन्त्री नेम्बाङ समक्ष आग्रह गरेको छ । 

मन्त्री नेम्बाङले समस्या समाधानका लागि सरोकारवाला निकायमा जानकारी गराइने एफक्यानले जनाएको छ । पूँजीगत खर्च तर्फको राष्ट्रको बजेटको करिब ६५ प्रतिशत खर्च गर्ने निर्माण व्यवसाय क्षेत्रको समग्र विकासले मात्र नेपाल सरकारको ‘समृद्घ नेपाल सुखी नेपाली’ को परिकल्पना साकार हुन र देश विकास हुन सक्छ भन्ने स्पष्ट धारणा महासंघले अघि सारेको छ । 
  
यसैबीच विगत केही समय यता देशका विभिन्न भागमा निर्माण कार्यमा खटिएका निर्माण व्यवसायी र निर्माण कार्यको लागि प्रयोगमा रहेका यन्त्र उपकरण माथि अज्ञात समुहबाट बारम्बार भइरहेको श्रृखंलावद्ध आक्रमण तथा आगजनीका घटनाबारे समेत  महासंघले मन्त्री नेम्बाङको गम्भीर ध्यानाकर्षण गराएको छ । 

विविध चुनौतिका बाबजुद निर्माण कार्यमा अहोरात्र खटिने व्यवसायीहरुलाई पेशाबाट नै पलायन गर्ने गरी भएको त्यस्ता आततायी घटनाको कडा शब्दमा निन्दा गर्दै महासंघले विगतमा यस्ता घटनामा संलग्नलाई कार्वाहीको दायरामा नल्याएका कारण नै एकपछि अर्को आक्रमण तथा आगजनीका घटना भइरहेको जनाएको छ । 

महासंघले घटनामा संलग्नलाई तत्काल पक्राउ गरी कडा भन्दा कडा कारवाहीको लागि आग्रह गर्दै व्यवसायीका उपकरणको सुरक्षाको पूर्ण प्रत्याभूति दिन मन्त्री नेम्बाङ समक्ष जोडदार माग गरेको छ । 

पीडित कम्पनीहरुलाई राज्यको तर्फबाट तत्काल उचित क्षतिपूर्तिको व्यवस्था गरिदिन आग्रह गर्दै महासंघले व्यवसायीहरुको संयमतालाई कमजोरी नठान्न आग्रह गरेको छ ।  

व्यवसायीहरु माथिको अन्याय, अत्याचार नरोकिए पेशागत सुरक्षाकालागि महासंघ देशभरको निर्माण कार्य ठप्प पार्दै सशक्त आन्दोलनमा उत्रन बाध्य हुने जानकारी महासंघले गराएको छ । 

प्रतिनिधिमण्डलमा  महासंघका उपाध्यक्ष आङदोर्जी लामा, महासचिव रोशन दाहाल, उपमहासचिव नरहरी थपलिया, कार्य समिति सदस्य उज्जल गौतम, कार्यालय प्रमुख प्रेम सिंह ऐर, जनसम्पर्क अधिकृत रामचन्द्र गिरी लयायतको सहभागिता रहेको थियो  ।

 

०००



प्रकाशित: २०७६ चैत्र ६
March 19th 2020

निर्माण सञ्चार

निर्माण सञ्चार : पुनःनिर्माण एवं प्रकोप चेतना विस्तारको पहरेदार