नेपाली समय: ०५:२३:०३ बिहान
वि.सं २०७९ जेठ १०   मंगलवार

ग्रीलजन्य फलामको किन बढयो मूल्य ? कारण खोज्न ग्रील महासंघको अन्तरक्रिया

निर्माण सञ्चार, २९ पुष,काठमाडौँ ।  निर्माण सामग्रीको मूल्य दिनप्रतिदिन  बढदै  गएको छ । अहिले विभिन्न निर्माण सामग्रीको मूल्यमा ५० प्रतिशतसम्मको वृद्धि भएको हो ।

होटल क्राउन प्लाजा नक्सालमा ग्रील तथा स्टील ब्यवसायी  महासघ नेपालद्वारा गठित ग्रील जन्य फलामको अस्वभाबिक मूल्य वृद्धि अनुगमन तथा छानबिन समिती र रोलिङ मिल्सका प्रतिनिधि बिचसम्पन्न  अन्तक्रिर्या कार्यक्रमलाइ सम्बोधन गरि सत्य तथ्य पत्तालगाउन गठित समितिलाइ सहयोग गर्न सबैमा  ग्रिल तथा स्टिल व्यवसायी महासंघले आग्रह गरेको छ । 

‘निर्माण सामग्रीमा दिनप्रतिदिन भइरहेको मूल्यवृद्धिले व्यवसायी र उपभोक्ताबिचको सम्बन्धमा दरार आएको र निर्माणको सिजनमै निर्माण सामग्रीको मूल्य बढेपछि व्यवसायी मात्रै होइन उपभोक्ता पनि ठूलो मारमा परेको  ग्रील तथा स्टील ब्यवसायी  महासघ जनाएको छ । विश्व महामारीका रुपमा फैलिएको कोरोना भाइरसको कारण उत्पन्न लकडाउनको समयमा सस्तो भएको निर्माण सामग्रीको मूल्य अहिले एक्कासी बढेपछि उपभोक्ताहरु ठूलो मारमा परेका हुन् ।


कोरोना महामारीका कारण लकडाउन भएको समयमा निर्माण सामग्रीको मूल्य सस्तो भएर निजी आवास, भवन तथा अन्य भौतिक संरचना निर्माण गर्न थालेको उपभोक्ताहरुले एक्कासी ठूलो आर्थिक भार व्यहोर्नु परेपछि अहिले समस्या परेका हुन् ।

पछिल्लो समय भएको मूल्यवृद्धिको कारण खोज्न निर्माण व्यवसायी, ग्रिल तथा स्टिल व्यवसायी लगायतका व्यवसायीहरु उद्योगी व्यवसायी र सरकारसँगै नै छलफलमा बस्न खोजिरहेका छन् ।

मंगलबार मात्रै ग्रिल तथा स्टिल व्यवसायी महासंघले हाल निर्माण सामग्री विशेष गरेर फलामजन्य निर्माण सामग्रीमा भएको मूल्यवृद्धिका बारेमा त्यससँग सम्बन्धित सरोकारवालाहरु सँग अन्र्तक्रिया कार्यक्रम राखेको थियो । सो कार्यक्रममा विभिन्न उद्योगीहरुलाई पनि बोलाइएको थियो । तर, सो कार्यक्रममा उद्योगीहरुको सहभागिता खासै देखिएको थिएन ।

उतm कार्यक्रममा जगदम्बा स्टिल र हुलास स्टिलले आफ्ना प्रतिनिधि पठाएको थियो । जगदम्बाका प्रभु आचार्य र हुलास स्टिलका सुनिल अधिकारीको सहभागिता रहेको सो कार्यक्रममा उनीहरुले पनि निर्माण सामग्री बढ्नुको खासै जवाफ दिन सकेनन् ।

ग्रिल तथा स्टिल व्यवसायी महासंघका अध्यक्ष मोहन कटुवालले अहिले निर्माण सामग्रीमा एक्कासी भएको मूल्यवृद्धिले व्यवसाय नै धरायशी हुने अवस्था आएको जनाए । विश्व महामारी रुपमा फैलिएको कोरोना भाइरसको कारण ठप्प भएको व्यवसाय सुरु भएको केही समयमै फेरि फलामजन्य वस्तुको मूल्यवृद्धि हुँदा व्यवसायी मात्र होइन उपभोक्ताहरु नै ठूलो मारमा परेको कटुवालको भनाई छ ।

उनका अनुसार यसअघि ६०र७० रुपैयाँ पर्ने स्टील अहिले १०५ रुपैयाँसम्म पर्ने गरेको छ । उनले सरकारले पनि यसतर्फ कुनै ध्यान नदिएको आरोप लगाए । एउटै वस्तुमा पहिले र अहिले ३ हजार रुपैयाँसम्म फरक पर्ने गरेको उनको भनाई छ ।

‘हिजो एउटा मूल्य आज अर्कै मूल्य हुँदा व्यापार गर्न पनि समस्या भइरहेको छ, उद्योगीले आफुखुसी मूल्यवृद्धि गरेको पनि सुन्नमा आएको छ, यसरी दिनप्रतिदिन मल्यमा परिवर्तन हुनु राम्रो होइन,’ उनले भने ।

यस्तै, कार्यक्रमम सहभागी एक व्यवसायीले सरकारले निर्वाचन घोषणा गरेसँगै उद्योगीहरुले निर्माण सामग्रीको मूल्य आफुखुसी बढाएको आरोप लगाए । ‘निर्वाचन नजिकिँदै छ, उद्योगी व्यवसायीहरुले सरकारलाई पैसा दिनु पर्छ भनेर आफुखुसी निर्माण सामग्रीको मूल्य बढाएका छन्, सरकारले पनि अनुगमन गर्न छोडेको छ, मूल्य बढेको भनेपनि खासै वास्ता सरकारी स्तरबाट देखिँदैन, यसबाट पनि सरकार र उद्योगीहरुको नियत प्रष्ट हुन्छ,’ ती व्यवसायीले भने ।

सम्पूर्ण निर्माण सामग्रीको मूल्यवृद्धि भएसँगै निर्माण व्यवसायीहरु पनि समस्यामा परेका छन् । कोरोना भाइरसको कारण ठप्प भएको निर्माण क्षेत्रको काम अहिले पनि सुस्त नै छ । पछिल्लो समय आफ्नो लय समातेको निर्माण क्षेत्रमा सामग्रीको मूल्य बढेसँगै निर्माणको काम सुस्त भएको छ ।

निर्माण व्यवसायी महासंघका अध्यक्ष रवि सिँहका अनुसार अहिले उद्योगीहरुले निर्माण सामग्रीको मूल्य आफुखुसी बढाएका हुन् । उनका अनुसार अन्तर्राष्ट्रिय बजारमा निर्माण सामग्रीको मूल्य बढे पनि नेपालमा त्यो सामग्रीको मूल्य बढ्न साढे दुई महिना जति समय लाग्छ तर अहिले नेपालमा दिनप्रतिदिन मूल्यवृद्धि भइरहेको छ ।

‘भारत वा अन्य देशमा निर्माण सामग्रीको मूल्य बढ्यो भने त्यसको असर नेपालमा साढे दुई महिनामा पर्छ, अहिले उद्योगीहरुले अन्तर्राष्ट्रिय रुपमा नै मूल्य बढेको भनेर बोलिरहेका छन्, जुन वास्तविक होइन, उनीहरुले निर्माण सामग्रीमा कार्टेलिङ गरिरहेका छन्,’ अध्यक्ष सिँहले भने ।

उनका अनुसार निर्माण सामग्रीको मूल्यवृद्धि हुँदा निर्माणका काम गर्न समस्या भइरहेको छ । आफुहरुले सरकारसँग विभिन्न समयमा छलफल तथा आफ्ना मागहरु राखे पनि त्यसको सुनुवाई नभएको उनको भनाई छ ।

‘अहिले उद्योगीले मूल्य बढाएको होकि भन्ने जस्ता शंका हुन थालेका छन्, त्यस्तो शंका गर्नु पर्ने अवस्था छैन, मूल्य पारदर्शी हुनु पर्छ भन्ने भनाई हाम्रो पनि हो, मूल्य समायोजन कुनै पनि स्तरबाट भएन,’ सिहँले भने ।

यस्तै, हुलास स्टिलका सुनिल अधिकारीले पनि भारतमा मूल्य बढेकोले त्यसको असर नेपालमा पनि देखिएको बताएका छन् । उनका अनुसार अहिले निर्माण सामग्रीको मूल्य पहिलेको भन्दा ५५ प्रशितले बढेको छ ।

‘अहिले एक्कासी मल्य बढेको देख्दा हामी नै अचम्ममा परेका छौं, एक महिना अगाडि एक मेट्रिक टनको ३७ हजार ५ सय रुपैयाँ पर्ने वस्तुको अहिले ५८ हजार भारतीय रुपैयाँ परिरहेको छ, नेपालमा त्यसको ८० हजार रुपैयाँ पर्छ, हामी नै घाटा खाएर बेचिरहेका छौं,’ उनले भने ।

अहिले विभिन्न व्यवसायीहरुले नेपाली उद्योगहरुले निर्माण सामग्रीमा कार्टेलिङ गरेको बताउँदै आएका छन् । निजी आवास, भवन तथा अन्य भौतिक संरचना निर्माण सुस्त हुँदा यससँग सम्बन्धित सबै मारमा परेको व्यवसायीहरुको भनाई छ ।


०००



प्रकाशित: २०७७ पौष २९
January 13th 2021

निर्माण सञ्चार

निर्माण सञ्चार : पुनःनिर्माण एवं प्रकोप चेतना विस्तारको पहरेदार