नेपाली समय: ११:३४:२२ बिहान
वि.सं २०७८ आश्विन ७   बिहीवार

४ वटा प्रदेशमा एकैपटक ५ औद्योगिक क्षेत्रको शिलान्यास

निर्माण सञ्चार, ९ फागुन, ०७७, काठमाडौं । यसै साता प्रधानमन्त्री केपी शर्मा ओली, अर्थमन्त्री विष्णु पौडेल तथा उद्योग वाणिज्य तथा आपूर्ति मन्त्री लेखराज भट्टले एकैपटक ४ वटा प्रदेशमा ५ वटा औद्योगिक क्षेत्र स्थापनाको शिलान्यास गर्ने भएका छन् ।

जसअन्तर्गत यही फागुन १० , ११ ,१३, १४ र १६ गते उक्त ५ औद्योगिक क्षेत्र शिलान्यास गर्ने कार्यक्रम तय भएको छ । जसमध्ये प्रधानमन्त्रीले दुई वटा, अर्थमन्त्री पौडेलले एउटा र उद्योग मन्त्री लेखराज भट्टले दुईवटा औद्योगिक क्षेत्रहरुको शिलान्यास गर्ने कार्यक्रम तय भएको औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेतले बताएका हुन् ।

सोमबार प्रधानमन्त्री केपी शर्मा ओली सुदूरपश्चिम जाँदैछन् । प्रधानमन्त्रीले फागुन १० गते सुदूरपश्चिम प्रदेशस्थित कञ्चनपुरको ‘दैजी–छेला औद्योगिक क्षेत्र’ र फागुन १६ गते प्रदेश १ को झापाको दमक नगरपालिका, कमल गाउँपालिका र गौरादह नगरपालिका क्षेत्रलाई समेटिएको ‘चीन–नेपाल औद्योगिक पार्कको शिलान्यास गर्ने कार्यक्रम रहेको छ ।

त्यस्तै उद्योग वाणिज्य तथा आपूर्ति मन्त्री भट्टले फागुन ११ गते लुम्विनी प्रदेशको बाँकेस्थित ‘नौबेस्ता औद्योगिक क्षेत्र’ र फागुन १४ वागमती प्रदेशको मकवानपुरस्थित ‘मयुरधाप औद्योगिक क्षेत्र’ को शिलान्यास गर्ने भएका छन् ।

त्यस्तै फागुन १३ गते अर्थमन्त्री पौडेलले लुम्विनी प्रदेशस्थित रुपन्देहीको ‘मोतिपुर औद्योगिक क्षेत्र’ शिलान्यास गर्ने छन् । यी पाँचवटा औद्योगिक क्षेत्रहरु पाँच वर्षभित्र निर्माण सम्पन्न हुने औद्योगिक विकास लिमिटेडका अध्यक्ष बस्नेतको दाबी छ ।

  • पाँच वर्षभित्र निर्माण सम्पन्न हुनेः २५ अर्ब वैदेशिक लगानी 

  • ५ मध्ये २ वटा विदेशी लगानी र ३ वटा स्वदेशी लगानीमै बन्ने 

लागत कति ?

‘फागुनको १० गते देखि १६ गतेसम्म शिलान्यास हुन लागेका ४ प्रदेशका पाँच औद्योगिक क्षेत्र पाँच वर्षभित्र निर्माण सम्पन्न हुने लक्ष्य राखिएको छ । जसको २५ अर्ब विदेशी लगानी रहेको छ । 

उक्त ५ औद्योगिक क्षेत्रमध्ये २ वटा विदेशी लगानी र ३ वटा औद्योगिक क्षेत्रहरु २५ अर्ब स्वदेशी लगानीमै बन्ने भएका छन् ।

सबैभन्दा ठूलो झापास्थित ‘चीन–नेपाल औद्योगिक पार्क’

५ वटा औद्योगिक क्षेत्रमध्ये प्रदेश नम्वर १ को झापास्थित ‘चीन–नेपाल औद्योगिक पार्क’सबैभन्दा ठूलो औद्योगिक क्षेत्र हो भने सबैभन्दा सानो वागमती प्रदेशको ‘मयुरधाप औद्योगिक क्षेत्र’रहेको छ ।

लागत कति ?

सरकारले दिएको जानकारी अनुसार सुदूरपश्चिम प्रदेशस्थित कञ्चनपुरको ‘दैजी–छेला औद्योगिक क्षेत्र’ ८ अर्ब स्वदेशी लगानीमा निर्माण सम्पन्न गर्ने सरकारको योजना रहेको छ । यसको क्षेत्रफल ४५० बिघा रहेको छ ।

त्यस्तै, लुम्विनी प्रदेशको बाँकेस्थित ‘नौबेस्ता औद्योगिक क्षेत्र’ ९ अर्ब स्वदेशी लगानीमा बन्ने भएको छ । जसको कुल क्षेत्रफल ३३८ बिघा रहेको छ ।

त्यस्तै, दोस्रो ठूलो औद्योगिक क्षेत्रका रुपमा लुम्विनी प्रदेशस्थित ‘मोतिपुर औद्योगिक क्षेत्र’ शिलान्यास हुने छ । यस औद्योगिक क्षेत्र १२ अर्ब विदेशी लगानीमा निर्माण गर्ने सरकारको योजना रहेको छ । यो औद्योगिक क्षेत्र करिब ९३५ बिघा क्षेत्रफलमा बन्ने छ ।

मकवानपुरस्थित ‘मयुरधाप औद्योगिक क्षेत्र’ सबैभन्दा सानो हो । २०० बिघा क्षेत्रफलमा रहने यस औद्योगिक क्षेत्र ८ अर्ब स्वदेशी लगानीमा सम्पन्न हुने सरकारको भनाइ छ ।

प्रधानमन्त्रीको मुख्य चासोः फागुन ११ गते शिलान्यास

प्रदेश नम्बर १ स्थित झापाको दमक नगरपालिका, कमल गाउँपालिका र गौरादह नगरपालिकालाई समेटेर ‘दमक–कमल–गौरादह औद्योगिक क्षेत्र’ फागुन ११ गते प्रधानमन्त्री ओलीले उद्घाटन गर्दैछन् । यी तीनवटै स्थानीय तह प्रधानमन्त्री केपी शर्मा ओलीको निर्वाचन क्षेत्रमा पर्ने महत्वपूर्ण क्षेत्रहरु हुन् । चीनको सहयोगमा निर्माण हुन लागेको यो औद्योगिक पार्क १४०० बिघा क्षेत्रफलमा बन्दै छ ।

०००



प्रकाशित: २०७७ फाल्गुण १०
February 22nd 2021

निर्माण सञ्चार

निर्माण सञ्चार : पुनःनिर्माण एवं प्रकोप चेतना विस्तारको पहरेदार