नेपाली समय: ०७:४१:१७ बिहान
वि.सं २०७७ साउन २१   बुधवार

उद्योग वाणिज्य महासंघको चुनावः वरिष्ठ उपाध्यक्षको दौडमा को–को ?

निर्माण सञ्चार, १५ माघ, काठमाडौं । उद्योग वाणिज्य महासंघको आगामी चैत २९ गते हुने चुनावमा वरिष्ठ उपाध्यक्ष पदको दौड रोचक हुने भएको छ ।  

महासंघको वरिष्ठ उपाध्यक्ष स्वतः अध्यक्ष बन्ने विद्यमान व्यवस्थाअनुसार शेखर गोल्छा आगामी अध्यक्ष बन्ने पक्का छ । अध्यक्ष पक्का भए पनि अन्य पदहरुमा भने चुनावी प्रतिस्पर्धा रोचक हुँदैछ ।

आगामी निर्वाचनबाट वरिष्ठ उपाध्यक्ष हुने व्यक्ति नै गोल्छापछि अध्यक्ष हुनेछन् । त्यसकारण पनि सबैभन्दा रोचक भने वरिष्ठ उपाध्यक्ष पदकाे लागि रस्साकस्सी हुने देखिएको छ । 

वर्तमान ३ उपाध्यक्षमध्ये चन्द्र ढकाल र उमेशलाल श्रेष्ठ एकै कित्तामा उभिने भएका छन् ।
यी दुईबीच चुनावमा कसरी अघि बढ्ने भन्नेमा सहमति भइसकेको छ । चुनाव नजिकिँदै जादा आकांक्षीहरुले दौडधुप तीब्र बनाएका छन् । 

वरिष्ठ उपाध्यक्षकै लागि आकांक्षी देखिएका दिनेश श्रेष्ठले पनि उपाध्यक्षमा लड्ने तयारी गरेका छन् ।

ढकाल र श्रेष्ठको प्यानलले आगामी चुनावका लागि गृहकार्य तीब्र बनाएको छ । मंगलबार मात्रै पनि यो समूहको बैठक बसेको थियो ।

ढकाल र श्रेष्ठ दुई उपाध्यक्षहरु एक ठाउँमा उभिएपछि अर्का उपाध्यक्ष किशोर प्रधान एक्लिएका छन् । 

तर, दुई उपाध्यक्ष एकातिर लागे पनि आफूले जित निकाल्ने दाबीसहित प्रधानले पनि भेटघाटलाई तीब्र बनाएका छन् ।

दिनेशलाई फकाउने प्रयास भने भइरहेको ढकाल समूहका एक व्यवसायीले बताए । ‘दिनेशजीसँग हामीले छलफल गरिरहेका छौं, वहाँलाई उपाध्यक्ष चाहियो भनेका कारण कुरा मिलिरहेको छैन’ ती व्यवसायीले भने, ‘कसरी हुन्छ हामी मनाउने प्रयास गरिरहेका छौं ।’

आगामी वरिष्ठ उपाध्यक्षका लागि उमेशलाल श्रेष्ठ बलियो दाबेदारका रुपमा छन् । हाल उपाध्यक्ष रहेका श्रेष्ठ नेकपाका संस्थापक पुष्पलाल श्रेष्ठ र चर्चित वामपन्थी नेतृ स्वर्गीय साहना प्रधानका छोरा हुन् ।

महासंघमा १०३ वटा वस्तुगत संघहरु छन् भने द्वीदेशीय संगठनहरु १८ वटा छन् । यो पनि वस्तुगतमै जोडिन्छ । 

वस्तुगततर्फको उपाध्यक्षमा सौन्दर्य व्यवसायी कमला श्रेष्ठ आकांक्षा राखेकी थिइन् । उमेशले आफू वरिष्ठ उपाध्यक्षमा उठे उनलाई वस्तुगत उपाध्यक्षमा सहयोग गर्ने बताएका थिए । तर, वस्तुगत उपाध्यक्षमा उमेश आफै उठ्ने भएपछि हाल महासंघको केन्द्रीय सदस्य श्रेष्ठले उम्मेद्वारी नदिने भएकी छन् । नाताले उनीहरु काकी–भतिज हुन् ।

वस्तुगत उपाध्यक्षका लागि व्यवसायी अञ्जन श्रेष्ठसमेत आकांक्षी देखिएका छन् । लक्ष्मी ग्रुपका अध्यक्ष रहेका श्रेष्ठ नाडा अटोमोवाइल डिलर्स एशोसिएसनका अध्यक्ष भइसकेका व्यक्ति हुन् । उमेश र अञ्जनबीच चुनावी प्रतिष्पर्धा हुने सम्भावना देखिएको छ ।

ढकाल समूहले गुणनिधि तिवारीलाई एशोसिएट उपाध्यक्षमा उठाउने तयारी गरेको ढकाल समूहका एक व्यवसायीले बताए । समूहको बैठकले वस्तुगततर्फ उमेशलाई र एशोसिएट उपाध्यक्षमा तिवारीलाई उठाउने निर्णय गरेको हो । तिवारी हाल महासंघको प्रदेश नम्बर ५ को अध्यक्ष रहेका छन् ।

गत अधिवेशनमा चन्द्र ढकाल एशोसिएटबाट उपाध्यक्ष चयन भएका थिए । यसपटक एशोसिएट उपाध्यक्षका लागि शौरभ ज्योतिले उम्मेद्वारी घोषणा गरेका छन् । 

केही महिनाअघि नै उनले संचार साक्षात्कारमा आफू उम्मेद्वार हुने जानकारी गराइसकेका थिए ।

हुन त यसअघिको निर्वाचनमा पनि उनले उम्मेद्वारी दिने तयारी गरेका थिए । तर, अन्तितमा आएर उम्मेद्वारी नदिएका कारण नै ढकाल सर्वसम्मत उपाध्यक्ष बनेका थिए । यसपालि भने उम्मेद्वारी फिर्ता नहुने उनले बताएका छन् ।

ढकाल र श्रेष्ठ दुई उपाध्यक्ष एक कित्तामा देखिए पनि उनीहरुको विपक्षमा अर्का उपाध्यक्ष प्रधान बरिष्ठ उपाध्यक्षका लागि लड्दैछन् । प्रधान यसअघि नै गोल्छासँग वरिष्ठ उपाध्यक्षमा लडिसकेका व्यक्ति हुन् । प्रधान आफूले यसपटक बरिष्ठ उपाध्यक्षमा जित्ने दाबी गर्छन् ।

यसपालिको वरिष्ठ उपाध्यक्षको उम्मेद्वार भएको र यसपालि जित हासिल गर्ने प्रधानले दाबी छ । कसैले चुनावमा उठ्दैन भन्ने कुरा गरिरहेको, तर त्यो गलत भएको उनले बताए ।

किशोर जिल्ला तथा नगर उद्योग वाणिज्य महासंघको तर्फबाट उदायका व्यक्ति हुन् । विराटनगरका व्यवसायी प्रधान बिजुलीको पोल उत्पादन गर्ने व्यवसायीहरुको संगठनको अध्यक्ष छन् ।

जिल्ला नगर उपाध्यक्ष प्रमोद श्रेष्ठले स्थानीय निर्वाचनमा उम्मेदवार बनेपछि उनको स्थानमा प्रधानलाई ल्याइएको थियो । यसपालि भने भने आफूले जित्ने र जितकै लागि चुनावी मैदानमा उत्रिन लागेको उनले बताए ।

प्रधानका अनुसार अहिलेसम्म आफुले कमाएको सम्पत्ति नै इमान्दारिता भएकाले सबैले बुझेर सहयोग समर्थनको आशा गर्दछु । 

 

 

०००



प्रकाशित: २०७६ माघ १५
January 29th 2020

निर्माण सञ्चार

निर्माण सञ्चार : पुनःनिर्माण एवं प्रकोप चेतना विस्तारको पहरेदार