निर्माण सञ्चार, २२ वैशाख, काठमाडौं । कर्णाली प्रदेश सरकारले आज (सोमबार) राति १२ बजेदेखि आफ्नो प्रदेश प्रवेश गर्ने सबै नाका पूर्ण रुपमा बन्द (सिल) गर्ने भएको छ ।

यो बन्द एक हप्तासम्म रहने छ ।

• आफ्नो प्रदेशभित्र उपलब्ध निर्माण सामग्री र जनशक्तिको परिचालन गरी भएका मेसिन उपकरणबाट सञ्चालन हुन सक्नेसम्मका सबै विकास निर्माणका आयोजना सञ्चालन गरिने छ

प्रदेशको विपद व्यवस्थापन केन्द्रको सोमबारको बैठकले सवारी तथा पैदलमार्ग पूर्ण रुपमा बन्द गरी लकडाउन मजबुत गर्ने निर्णय गरेको हो ।

केही दिनदेखि नेपालगन्जमा कोरोना संक्रमितको संख्या ह्वात्तै बढेपछि आफूसँग सिमाना जोडिएको क्षेत्रसँग सुरक्षित रहन नाका सिल गर्ने निर्णय लिएको कर्णाली प्रदेश सरकारको भनाइ छ ।

नेपालगञ्ज क्षेत्र प्रदेश ५ अन्तर्गत तर कर्णालीसँग सीमा जोडिएको भुभाग हो । सम्भावित जोखिम रोक्न प्रदेशको नाका सिल गर्ने निर्णय लिनु परेको बैठकमा सहभागी एक अधिकारीले बताए ।

साथै, सरकारले यही हप्ता भित्र भारतलगायत तेस्रो मुलुकबाट प्रदेश प्रवेश गरेका व्यक्तिहरुको समेत अवस्था र विवरण संकलन गर्ने निर्णय पनि गरेको छ । 

यस अवधिमा सम्बन्धित स्थानीय तहले भारत लगायत तेस्रो मुलुकबाट आएका नागरिकको तथ्यांक तयार पारी प्रदेश सरकारलाई बुझाउने पनि छ ।

सोही तथ्यांकको आधारमा प्रदेश सरकारले भारत वा तेस्रो देशबाट आएका तर सम्पर्कमा नआएकाहरुको कोरोना जाँचको व्यवस्था गर्ने छ । 

दुर्गममा हेलिकोप्टरबाट औषधी पठाउने 

वैठकले आवश्यक परेमा प्रदेशको दुर्गम स्थानमा हेलिकप्टरबाट समेत स्वास्थ्य जनशक्ति र औषधि पठाउने निर्णय गरेको प्रदेश मुख्यमन्त्री तथा मन्त्रिपरिषद कार्यालयले जनाएको छ ।

निर्माण कार्य सञ्चालन गराउने

साथै, आफ्नो प्रदेशभित्र सञ्चालनमा रहेका तर लकडाउनका कारण रोकिएका आयोजनाहरु पनि सञ्चालन गराउने निर्णय गरेको छ ।

आफ्नो प्रदेशभित्र उपलब्ध निर्माण सामग्री र जनशक्तिको परिचालन गरी भएका मेसिन उपकरणबाट सञ्चालन हुन सक्नेसम्मका सबै विकास निर्माणका आयोजना सञ्चालन गरिने छ । 

यसरी पूर्वाधार विकास निर्माण कार्य गराउँदा सम्बन्धित निर्माण व्यवसायीले कामदार तथा प्राविधिकहरुलाई ग्रुप आइसोलेसन गरी सुरक्षा प्रबन्ध मिलाउनु पर्ने निर्णय समेत गरेको मुख्यमन्त्रीका प्रेस संयोजक ध्रुवविक्रम बुढाथोकीले निर्माण सञ्चारलाई जानकारी दिए ।

०००

प्रकाशित: २०७७ बैशाख २२