नेपाली समय: १२:५८:५९ राती
वि.सं २०७७ कार्तिक ११   मंगलवार

आइपुग्यो रेलः बन्द भएको ६ वर्षपछि जनकपुरधामबाट रेल सञ्चालन सुरु !

निर्माण सञ्चार, ०२ असोज २०७७ । जनकपुर । चीरप्रतीक्षित जनकपुर–जयनगर रेल शुक्रबार जनकपुरधाम आइपुगेको छ। रेल आएको दृश्य हेर्न ओइरिएका नेपालीहरु खुसीले गद्गद् भएका छन् । 

यस अघि करिब ६ वर्ष अघि यो रेलसेवा बन्द भएको थियो, जुन नेपालको एक मात्र जनकपुर जयनगर रेल सेवा थियो । 

बन्द भएको झण्डै छ वर्षपछि विधिवत सञ्चालनका लागि रेल जनकपुरधाम आइपुगेको हो।  

रेल्वे विभाग नेपालले जनकपुर जयनगर रेल्वे सेवा सञ्चालनका लागि इन्जिन र बोगी भारतको मद्रासबाट बनाएर हाजिपुर जयनगर हुँदै जनकपुरधाम सम्म ल्याइएको हो। लामो समयको प्रतिक्षापछि बहुप्रतिक्षित कुर्था जनकपुर जयनगर रेल्वे सेवा सञ्चालनका लागि भारतबाट २ सेट रेलको बगी र ४ वटा इन्जिन नेपाल ल्याइएको साईट इन्जिनियर विनोद ओझाले जानकारी दिए। 

नेपालको राष्ट्रिय झण्डा अंकित रंगमा तयार पारिएका दुवै रेल सेट जनकपुर आइपुगेका छन्। 

कुर्था जनकपुरधाम जयनगरसम्म रेल सञ्चालनका लागि १ अर्बको लागतमा भारतको मद्रासस्थित इन्टिग्रल कोक्स नामक कम्पनीसँग सम्झौता गरेको थियो। एक पटकमा १३ सय यात्रु अटाउने क्षमता रहेको रेल हेर्न हजारौं सर्वसाधारणको भीड लागेको थियो।  

रेल आइपुग्दा खुशी भएका स्थानीय तस्बिर खिच्न तछाडमछाड गरिरहेका थिए।

भारतको जयनगरबाट जनकपुर हुँदै कुर्थासम्म ३४ किलोमिटरमा गत वर्षको मंसिर महिना पहिलो सातामै लिक परीक्षण भएको थियो । नेपालकै झन्डा अंकित रेल आएपछि जनकपुरमा स्थानीयले खुशीयाली मनाएका छन् ।  

 

हेरौं भिडियो पनि

 

https://www.youtube.com/watch?time_continue=52&v=kRwGZlqVlYo&feature=emb_logo  

अन्नपूर्ण पोस्टको सहयोगमा तयार गरिएको समाचार

 

०००



प्रकाशित: २०७७ आश्विन २
September 18th 2020

निर्माण सञ्चार

निर्माण सञ्चार : पुनःनिर्माण एवं प्रकोप चेतना विस्तारको पहरेदार