निर्माण सञ्चार, १७ असोज, काठमाडौं । 

नेपाली सेनाद्वारा निर्माण निर्माणाधीन काठमाडौं–निजगढ द्रुतमार्गमा सुरुङमार्ग निर्माण गर्न ४३ निर्माण कम्पनीले आवेदन दिएका छन् ।

द्रुतमार्गबारे सेनाले दिएको जानकारी अनुसार परेका आवेदनमध्ये १६ वटा कम्पनीले आयोजनाका सुरुङमार्गका लागि बनाइएका दुबै प्याकेजको पूर्वायोग्यता निर्धारण गर्ने प्रतिस्पर्धामा आफूलाई सहभागी हुने आशय सहित आवेदन दिएका हुन् ।

• द्रुत मार्गबारेको विस्तृत परियोजना प्रतिवेदन (डिपिआर) अनुसार सो द्रुतमार्गमा ८७ वटा पुल र ३ वटा सुरुङमार्ग निर्माण गर्नु पर्ने छ
• महादेवडाँडामा ३.३५५ किलोमिटर, धेद्रेमा १.६३० किलोमिटर र लेनडाँडामा १.४३० किलोमिटर लम्बाइ रहेका ३ वटा सुरुङ मार्ग रहने छन् 
• सेनाले महादेवडाँडाको सुरुङसहित ४.६ किलामिटरको सडक तथा सुरुङमार्ग र धेद्रे तथा लेनडाँडाको सुरुङमार्गलाई छुट्टा छुट्टै प्याकेज बनाएर आशयपत्र माग गरेको थियो 
• काठमाडौं तराई जोड्ने उक्त द्रुतमार्गको कुल लम्बाइ ७२.५ किलोमिटर रहेको छ । यसका लागि लागत कुल १ खर्ब ७५ अर्ब रहने अनुमान गरिएको छ

सुरुङमार्ग निर्माणका लागि प्रतिस्पर्धामा सहभागी कम्पनीको संक्षिप्त सूची (सर्ट लिस्ट) तयार गर्न नेपाली सेनाले आशयपत्र आह्वान गरेको थियो । जसमा एउटा प्याकेजमा २१ र अर्को प्याकेजमा २२ कम्पनीको आवेदन परेको सेनाका सहायकरथी तथा प्रवक्ता सन्तोष बल्लभ पौडेलले बताएका हुन् ।

उनले ४३ आवेदनबाट फरक फरक प्याकेजमा लागि फरक फरक योग्य कम्पनीहरु सर्ट लिस्ट गरिने जानकारी दिए । 

प्रवक्ताका अनुसार सर्ट लिस्ट गरिएका कम्पनीलाई अब अर्काे पटक फेरि आर्थिक तथा प्राविधिक प्रस्ताव पेस गर्न थप ३ महिनाको समय दिएर टेन्डर गरिने छ ।

उनले भने, ‘नोभेम्बरसम्म सर्ट लिस्ट भएका कम्पनीका लागि टेन्डर हुन्छ । आउने मे महिनासम्ममा काम सुरु गर्ने गरी सहिभागी गराइन्छ ।’

आजका दिनमा एउटा कोरियन कम्पनी ‘युसिन’ले उक्त द्रुत मार्ग अन्तर्गत पर्ने पुल तथा सुरुङमार्गको डिजाइन गरिरहेको छ । सैनिक स्रोत अनुसार अब जतिसक्दो चाँडो पुल तथा सुरुङहरुको निर्माण कार्य थाल्ने गरी आन्तरिक तयारी भइरहेको छ ।

द्रुत मार्गबारेको विस्तृत परियोजना प्रतिवेदन (डिपिआर) अनुसार सो द्रुतमार्गमा ८७ वटा पुल र ३ वटा सुरुङमार्ग निर्माण गर्नु पर्ने उल्लेख छ ।

डिपिआरले उल्लेख गरे अनुसार महादेवडाँडामा ३.३५५ किलोमिटर, धेद्रेमा १.६३० किलोमिटर र लेनडाँडामा १.४३० किलोमिटर लम्बाइ रहेका ३ वटा सुरुङ मार्ग रहने छन् ।

यस अघि सेनाले महादेवडाँडाको सुरुङसहित ४.६ किलामिटरको सडक तथा सुरुङमार्ग र धेद्रे तथा लेनडाँडाको सुरुङमार्गलाई छुट्टा छुट्टै प्याकेज बनाएर आशयपत्र माग गरेको थियो ।

काठमाडौं तराई जोड्ने उक्त द्रुतमार्गको कुल लम्बाइ ७२.५ किलोमिटर रहेको छ । यसका लागि लागत कुल १ खर्ब ७५ अर्ब रहने अनुमान गरिएको छ ।

०००

 

प्रकाशित: २०७७ आश्विन १७