निर्माण सञ्चार, २३ कार्तिक,काठमाडौँ ।डोल्पा जोड्ने मुख्य सडक अन्तर्गत पर्ने जाजरकोट–डोल्पा सडकखण्डको खदाङ्ग–त्रिवेणी खण्ड दुई सातासम्म पनि खुल्न सकेको छैन् ।  जसले गर्दा दुई सातादेखि सडक अवरुद्ध बनेको छ । 

त्रिपुरासुन्दरी नगरपालिका ५ मा पर्ने कुच्ची भिर नजिकै दुई सय मीटर माथिबाट खसेको भिषण सुख्खा पहिरोका कारण अवरुद्ध भएको उक्त सडक दुई साता बितिसक्दा समेत खुल्न नसकेको हो । निरन्तर रूपमा माथिबाट सुक्खा पहिरो खसिरहेकाले सडक खुलाउन कठिनाइ भएको त्रिपुरासुन्दरी नगरपालिकाले जनाएको छ ।

पहिरो पन्छाउन एक सातादेखि दुईवटा डोजर प्रयोग गरिएको छ । तर, पहिरो खस्ने क्रम नरोकिएकाले काम गर्न नसकिएको त्रिपुरासुन्दरी–६ का सदस्य अमृत सार्कीले जनाए । ‘डोजरले माटो पन्छाएपछि फेरि पहिरो खसिहाल्छ, केहीबेरमै पहिरो खसेर जस्ताको तस्तै हुन्छ । काम गर्न निकै समस्या भएको छ,’ वडा सदस्य सार्कीले भने ।

पहिरो पन्छाउँदा पन्छाउँदै नगरपालिकाको डोजर आंशिक रुपमा पुरिएको र अर्को डोजर प्रयोग गरि निकालिएको वडा सदस्य सार्कीले बताए ।  सुक्खा पहिरोले ५० मिटर सडकमा पूर्ण रूपमा क्षति पुगेको छ । पहिरोले सडक अवरुद्ध हुँदा दैनिक उपभोग्य सामान ढुवानी गर्न दुई सातादेखि रोकिएको छ ।

जसले गर्दा उपभोग्य सामानको अभाव हुन थालेको छ । सडक अवरुद्ध हुँदा सहुलियतको चामल ढुवानी रोकिएको खाद्य व्यवस्था तथा व्यापार कम्पनी, डोल्पाले जनाएको छ । शुक्रबार जोखिम मोलेर तीनवटा ट्र्याक्टर र केही गाडी पास भए पनि पनि फेरि अवरुद्ध भएको उनले बताए । सुख्खा पहिरोले सडक आसपासको पचास मीटर सडक पुर्ण रुपमा क्षति पुत्याएको जिल्ला प्रहरी कार्यालय डोल्पाले जनाएको छ ।

०००

प्रकाशित: २०७७ कार्तिक २३