निर्माण सञ्चार, ९ वैशाख, काठमाडौं । उदयपुरका थप ८ जनामा कोरोनाभाइरस संक्रमण पुष्टि भएको छ ।

यो पुष्टि भएसँगै नेपालमा कोरोनाभाइरस संक्रमितको संख्या अब ४२ पुगेको छ । 

मंगलबार बिहान उदयपुरबाट संकलन गरिएको स्वाब धरानस्थित विपी कोइराला स्वास्थ्य विज्ञान प्रतिस्ठानको ल्याबमा परीक्षण गर्दा आठै जनाको नमुना पोजेटिभ आएको स्वास्थ्य मन्त्रालयले जनाएको छ । 

मन्त्रालयले गरेको नियमित पत्रकार सम्मेलनमा दिइएको जानकारी अनुसार अब नेपालमा कोरोना संक्रमितको संख्या ४० पुगेको छ । 

तर, संक्रमित पुष्टि भएका ८ जनाको थप विवरण आउन भने बाँकी छ । यसअघि उदयपुरमै आज एक ३३ वर्षीय पुरुषमा कोरोनाभाइरस संक्रमण पुष्टि भएको थियो । 

राष्ट्रिय जनस्वास्थ्य प्रशोगशाला टेकुमा गरिएको परीक्षणमा उनीमा कोरोनाभाइरस पुष्टि भएको स्वास्थ्य मन्त्रालयका प्रवक्ता डा विकास देवकोटाले बताएका थिए । 

उनका अनुसार उदयपुरका १०० जनाको पिसिआरको लागि नमुना संकलन भएकामा धरानमा परीक्षण भइरहेको थियो । 

नेपालमा यतिबेला उदयपुर सर्वाधिक कोरोना संक्रमित जिल्ला बन्न पुगेको छ । जुन जिल्लामा मात्रै कोरोना संक्रमित २२ जना पुगेका छन् ।

नेपालको पछिल्लो अपडेट अनुसार कोरोना संक्रमितको संख्या ४० पुगेको छ भने उपचार पछि निको भएर घर फर्कनेको संख्या ४ रहेको छ ।

गत शुक्रबार उदयपुर भुल्केस्थित मस्जिदमा रहेका १६ मध्ये एकैपटक १२ जनामा कोरोना संक्रमण पुष्टि भएको थियो । 

परीक्षणपछि बाँकी ४ जनामध्ये थप एकजना पनि संक्रमण पुष्टि भएको देखियो।

गत शनिबार उक्त १३ जना संक्रमितसँग सम्पर्कमा आएका ६९ जनाको स्वाब परीक्षण गर्न विराटनगर पठाइएकोमा ८ जनामा कोरोना देखिएको हो।

यो पछिल्लो कोरोना संक्रमित मध्ये १३ जना मुस्लिम समुदायकै मानिसहरु रहेका छन् । 

०००

प्रकाशित: २०७७ बैशाख ९