निर्माण सञ्चार, १९ वैशाख, काठमाडौं । सत्तारुढ दल नेपाल कम्युनिस्ट पार्टी भित्र पछिल्लो संकटको कडी पदका लागि छिनाझम्टी देखिइरहेकै बेला कास्की क्षेत्र नम्बर १ का सांसद खगराज अधिकारीले भने पार्टीको एकता मजबुत बनाउनका लागि आफ्नो निर्वाचन क्षेत्र समेत त्याग गर्न तयार रहेको घोषणा गरेका छन् ।

• अवधि नपुग्दै ‘आफ्नै पार्टीले सरकार छाड्न दबाब’ दिइरहेको यो अशोभनीय दृश्यले ०५१ सालमा तत्कालीन एमाले अध्यक्ष मनमोहन अधिकारीको अल्पमतको सरकार ढालेको परिदृश्य दोहोराइरहेको आलोचकहरुको भनाइ छ

उनको यो उद्घोषसँगै त्यागको खडेरी परिरहेको नेपाली राजनीतिमा चर्चाको चुलीमा पुगेका छन् । सामाजिक सञ्जालभर उनलाई ‘उच्च कद’ भएका नेताका रुपमा टिप्पणी भइरहेको छ ।

प्राइम टेलिभिजनको एक अन्तर्वार्तामा पूर्वस्वास्थ्यमन्त्री समेत रहेका नेता अधिकारीले यस्तो घोषणा गरेका हुन् ।

निर्माण मिडियासँगको संक्षिप्त टेलीवार्तामा नेता अधिकारीले भने, ‘यस्तै बेलामा हो त्यागको आवश्यकता । यस्तै त्यागले जनताको सपना बोकेका पार्टी रुपी जहाजहरु दुर्घटना हुनबाट बचेको कुरा हामीले हाम्रा गौरवशाली इतिहासबाट पढेका छौं । त्यसलाई व्यवहारमा उतार्नु पर्ने बेला आएको मैले महसुस गरें । त्यसैले म आफ्नो निर्वाचन क्षेत्र पनि पार्टीको एकता, सदृढता र सरकारले बोकेको समृद्धिको सपना साकार होस्, कसैले कुनै पनि कोणबाट गरेको प्रहार कमजोर होस् भनेर त्याग्न तयार रहेको हुँ ।’

पछिल्ला दिनमा सत्तारुढ नेकपा भित्र देखिएको चरम द्वन्द्वबारे विभिन्न आलोचना भइरहेकै बेला नेता अधिकारीले ‘आफूलाई हैन जनताको सपना बोकेको पार्टी बचाउन’ भन्दै यस्तो प्रस्ताव अघि सारेको बताए ।

विधि र पद्धतिका कुरा गर्दै विधि र पद्धति नै मिच्दै आजको नेकपामा पूर्व प्रधानमन्त्रीहरु पनि आ–आफ्ना स्वार्थ सिद्ध गर्न निर्वाचनबाट आएको प्रधानमन्त्री ढाल्ने खेलामा लागेका छन् । यसको आलोचना पनि भइरहेकै छ ।

विधि वा पद्धति अनुसार आवधिक निर्वाचनबाट आएको कुनै पनि उम्मेदवार सही सलामत रुपमा सरकार सञ्चालन गरिरहेकै अवस्थामा पदच्युत गर्ने कुरा राणा शासनमा मात्र सुहाउने गथ्र्याे । लोकतन्त्रमा सुहाउने कुरै होइन ।

सरकारबाट कुनै प्रधानमन्त्रीले राजिनामा दिने भन्ने कुरा (अपवाद बाहेक) सहीसलामत अवस्थामा दबाब दिनु अलोकतान्त्रिक नै मानिन्छ ।

त्यसमा पनि नेपाल विश्वमहामारी कोरोना विरुद्ध एकढिक्का भएर लड्नु पर्ने बेलामा छ । तर, सत्तारुढ दल, जसमा पूर्व प्रधानमन्त्रीहरु समेत चार–चार जना रहेका छन्, आफूले पद नपाएको भन्दै प्रधानमन्त्रीको राजिनामाका लागि बाध्यात्मक परिस्थिति सिर्जना गरिरहेका छन् । 

तर विधिको कुरा गरेर प्रधानमन्त्री विरुद्ध छेडिएको यस जेहादलाई हेर्दा, आम निर्वाचनको विधि र पद्धतिलाई नै गिज्याउँदै पूर्व चार प्रधानमन्त्रीहरुले आ–आफूले ‘यो यो’ पद पाउनु पर्छ भन्दै सही सलामत सरकार सञ्चालन गरिरहेका प्रधानमन्त्री तथा अध्यक्ष केपी शर्मा ओलीको सरकार ढाल्ने खेलामा लागेका छन् । 

अवधि नपुग्दै ‘आफ्नै पार्टीले सरकार छाड्न दबाब’ दिइरहेको यो अशोभनीय दृश्यले ०५१ सालमा तत्कालीन एमाले अध्यक्ष मनमोहन अधिकारीको अल्पमतको सरकार ढालेको परिदृश्य दोहोराइरहेको आलोचकहरुको भनाइ छ । 

त्यतिबेला त प्रतिपक्षी दलले गरेको थियो, तर आज आफ्नै पार्टीबाट यस्तो दबाब दिनु अशोभनीय देखिने भन्दै विभिन्न आलोचना भइहेको छ ।

तर, यतिबेला भने मनहोनकै विरासत बोकेको पूर्व नेकपा एमाले र १० वर्षे सशस्त्र द्वन्द्वबाट आएको नेकपा माओवादी सहितको दुई तिहाइ नजिकको सरकारले सत्ता हाँकिरहेको छ । 

जनताका बीचमा स्थिर सरकार र स्थायित्व मार्फत् विकास र समृद्धि दिने बाचा गरेको सरकारलाई अदलबदल गर्न सोही दल लागिपरिरहेको छ ।

‘इतिहासका ती दुखद अध्यायहरु, जहाँ भीमसेन थापा र मनमोहन जस्ता नेताहरु सही काम गर्दागर्दै ‘सहिद’ बनाइए, त्यस्तै दृश्य पटाक्षेप हुने गरी प्रधानमन्त्री ओलीमाथि आफ्नै पार्टीले ‘कू’ गरिरहेको छ, जुन सुहाउने कुरै होइन,’ एक नागरिक अगुवाले निर्माण सञ्चारसँग भने ।

यता काश्की क्षेत्र नम्बर–१ का सांसद अधिकारीले भने आफ्नो त्याग इतिहासको दुर्घटना जोगाउनका लागि उदाहरण हुनेमा विश्वस्त छन् ।

उनले बेलाबखत सरकार र सत्ता, समाज र व्यक्तिमा पनि यस्तो समस्या देखिने भन्दै, यस्तै बेलामा त्यागको आवश्यकता पर्ने बताए । 

उनले अवसरवादी प्रवृत्तिलाई पनि त्यागले सच्याउने सकिने दृढता व्यक्त गरेका छन् ।

२० गते सचिवालय वैठकबाट नेता बामदेव गौतमलाई प्रधानमन्त्री बनाउन बाटो खोल्ने वा नखोल्नेबारे टुंगो लाग्ने भन्ने चर्चा चलिरहेकै बेला उनकै लागि नेता अधिकारीले आफूले राजीनामा दिएर निर्वाचन क्षेत्र खाली गर्न तयार रहेको बताएका हुन् । 

उनले बामदेवलाई  प्रधानमन्त्री बन्ने बाटो खोल्नका लागि संविधान संशोधन गरिराख्न जरुरी नभएको र संविधानको मर्म च्यातेर बलिदानले प्राप्त लोकतान्त्रिक गणतन्त्रलाई असर गर्ने समेत बताएका छन् ।

यस अघिको नेकपाको सचिवालय वैठकमा प्रधानमन्त्री ओलीले नै उपाध्यक्ष गौतमलाई प्रधानमन्त्री बनाउने गरी राष्ट्रिय सभामा लैजान प्रस्ताव गरेका थिए । 

तर, उनका लागि यसरी जाने कुराको पनि विरोध भइरहेको छ । किनकि चुनावमा पराजित नेतालाई पद दिलाउन संविधान संशोधन गर्ने कुराले जनमानसमा नेकपामाथि नै आलोचना भइरहेको छ । 

नेता अधिकारीले बामदेवका लागि संविधान संशोधन आवश्यक नरहेको बताउँदै आफू त्याग गर्न तयार रहेको बताएका हुन् ।

०००

 

 

प्रकाशित: २०७७ बैशाख १९