निर्माण सञ्चार, ४ मंसिर, काठमाडौं । लामो समयदेखि मन्दीको मारमा पिल्सिएको नेपाली सेयर बजारमा यतिबेला हरियाली देखिन थालेको छ । आजको दिनमा भने यसले नयाँ रेकर्ड हासिल गरेको छ । 

बिहीबार अर्थात् साताको अन्तिम दिनको सेयर कारोबार ६ अर्ब भन्दा बढी रकमको भएकोले नयाँ रेकर्ड देखिएको हो ।

नेपाल स्टक एक्सचेञ्ज (नेप्से) का प्रवक्ता मुराहरी पराजुलीका अनुसार सेयर कारोबार रकमले नयाँ रेकर्ड बनाएको हो । उनले एकै भने, ‘यसअघि ४ अर्ब ८५ करोड रुपियाँको कारोबार भएको थियो, तर, आज (बिहीबार) नयाँ रेकर्ड कायम भएको छ ।’

नेप्सेमा कारोबार हुने सबै उपसमूहहरु बिहीबार उकालो लागेका छन् । सेयर कारोबार मापक नेप्से परिसूचक पनि ३० अंक माथिले बढेको छ । 

यसले सेयरबजारका सट्टेदारहरु खुशी भएको बताउँछन् । 

नेपाल इन्भेष्टर्स फोरमका अध्यक्ष छोटेलाल रौनियारले बिहीबारको कारोबारले लगानीकर्ताहरुलाई उत्साह थपेको प्रतिक्रिया दिएकाछन् । उनले थपे, ‘सेयर बजारमा ऐतिहासिक रेकर्ड कायम भएको छ । अब लगानीकर्ता झनै उत्साहित हुने छन् ।’ 

उनले अब बजार पहिलेको अवस्थामा नझर्ने दाबी गरेका छन् ।

यही सेयर बजार हो, कुनै बेलामा झरेर ११ सयमा पुगेको थियो । आजका दिनमा नेप्से परिसूचक १८ सय नजिक पुगेको छ । 

३६ अंकले बढ्यो नेप्से 

बिहीबार सेयर कारोबार मापक नेप्से परिसूचक ३६ दशमलव ३२ अंकले बढेर १ हजार ७ सय ७८ दशमलव १२ अंकमा पुगेको छ । ‘क’ वर्गका कम्पनीहरुको कारोबार मापन गर्ने सेन्सेटिभ इन्डेक्स पनि १.४७ प्रतिशत अर्थात ४.९८ प्रतिशतले बढेको छ ।

दिनभर भएका ५६ हजार ३ सय ४१ कारोबारबाट १ सय ९८ कम्पनीका १ करोड ४० लाख ६२ हजार ५ सय ७ कित्ता सेयर किनबेच भएका छन् ।

जसअनुसार कारोबार रकम ६ अर्ब ११ करोड ६७ लाख ३० हजार ७१ रुपियाँ पुगेको छ । यो नेपाली सेयर बजारको इतिहासकै सबैभन्दा धेरै हो ।

०००

प्रकाशित: २०७७ मंसिर ४