निर्माण सञ्चार, काठमाडौं, १३ असोज, ०७८।

तुलनात्मक रुपमा सस्तो लगानीमा बन्दै गरेको मध्य भोटेकोशी जलविद्युत कम्पनीले सर्वसाधारणका लागि साधारण सेयर जारी गर्ने भएको छ । कम्पनीले यही असोज २० गतेबाट उक्त सेयर जारी गर्ने भएको हो । 

यस अघि स्थानीय प्रभावितलाई सेयर बाँडफाँट गरिसकेको कम्पनीले त्यसलगत्तै सर्वसाधारणलाई पनि बिक्री खोलेको हो ।

उक्त सेयर नेपालभित्रका जोकोहीले पनि भर्न पाउने छन् । जुन असोज २५ गतेसम्म बिक्री गर्ने कम्पनीले जनाएको  छ। सेयरको मूल्य १०० रुपियाँ अंकित दरमा कुल ९० लाख कित्ता सेयर बिक्री गर्ने छ ।

कम्पनीले आफ्नो कूल सेयरको ३ लाख ६० हजार कित्ता आफ्ना कर्मचारीलाई छुट्याइएको छ भने ४ लाख ५० हजार कित्ता सेयर सामूहिक लगानी कोष कम्पनीहरुका नाममा वितरण गर्ने छ । बाँकी ८१ लाख ९० हजार कित्ता सेयर चाहिँ सर्वसाधारणका लागि खुला गर्न लागेको हो ।

उक्त सेयरका लागि कम्तीमा १० कित्ता र अधिकतम १० हजार कित्तासम्म आवेदन दिन पाइने कम्पनीले जनाएको छ । 

उक्त जलविद्युत् कम्पनीबाट १०२ मेगावाट क्षमताको परियोजना बनिरहेको छ।

नेपाल विद्युत् प्राधिकरणले निजी क्षेत्रलाई दिने दररेट र उसकै अन्य हाइड्रो पावरका तुलनामा यस कम्पनीको लागत तुलनात्मक रुपमा सस्तोमा हो । जसमा प्रति मेगावाट लागत १६ करोड ६४ लाख रुपियाँ लाग्ने अनुमान छ। यो परियोजनाको कुल लागत १६ अर्ब ९७ करोड रुपियाँ रहेने अनुमान छ।  

०००

प्रकाशित: २०७८ आश्विन १३