एनआरएनए सम्मेलनः ओसेनिया क्षेत्रका लागि दिनेशराज जोशीको उम्मेदवारी घोषणा

निर्माण सञ्चार, २८ असोज, काठमाडौं । एनआरएनएको नवौं विश्वसम्मेलनमा अस्ट्रेलिया रहेका दिनेशराज जोशीले आफ्नो उम्मेदवारी घोषणा गरेका छन् ।

त्यहाँबाट ओसेनिया क्षेत्रको संयोजकमा उम्मेदवारी घोषणा गरेको उनले बताए । जोशीले चुनावी अभियानलाई तीव्र पार्दै आफू अब्बल उम्मेदवार रहेको दाबी गरेका छन् ।

हाल अष्ट्रेलियाबाट एनआरएनएका आईसीसी सदस्य रहेका जोशीले अष्ट्रेलिया र समग्र ओसेनिया क्षेत्रबाट नेपालसँग सेतुको भूमिका खेल्ने उनको नारा रहेको छ ।

दुई दशकयता अष्ट्रेलियामा रोजगारीसँगै सामाजिक क्षेत्रमा सक्रिय जोशी जनसम्पर्क समिति अष्ट्रेलियाका संस्थापक मध्येका एक हुन् ।
नेपालबाट अष्ट्रेलिया गएका युवाहरुलाई रोजगारी तथा अप्ठेरोमा साथ दिने जोशी सामाजिक अभियान सञ्चालनमा अग्रणी मानिन्छन् ।

सबै दल निकटसँग समभावको आधारमा अघि बढेकाले आफूलाई ओसेनिया क्षेत्रबाट उम्मेदवारीका लागि दबाब आएकाले अघि बढेको उनले बताए ।

‘एनआरएनएको विभिन्न जिम्मेवारीमा रहेपछि अब ओसेनिया क्षेत्रकै प्रतिनिधिका रुपमा अघि बढ्नुस् भन्ने सुझाव आएकाले उम्मेदवारी दिएको छु,’ उनले भने ।

चुनावी अभियानका क्रममा आफूलाई सबै क्षेत्रबाट सहयोगको प्रतिवद्धता आएको उनले बताए ।
‘हाम्रो राजनीतिक आस्था आ आफ्नो ठाउँमा छ,’ उनले भने, ‘नेपालीको छाता संगठनलाई राजनीतिबाट पर राखेर अघि बढ्नुपर्छ भन्ने मेरो धारणा हो ।’

उनले सबै विचार र पक्षलाई समेटेर नेपालमा लगानीका साथै अष्ट्रेलिया र न्युजिल्याण्डका विद्यार्थी र नेपालीको समस्या समाधानमा विशेष जोड दिने बताए ।

०००

पढौं यी पनि