निर्माण सञ्चार, ६ वैशाख, काठमाडौं । छैठौं कोरोना भाइरस (कोभिड १९) संक्रमित बनेकी  बागलुङकी ६५ वर्षीया महिलाले पनि कोरोना माथि विजय प्राप्त गरेकी छन् ।

उनको अन्तिम रिपोर्ट नेगेटिभ आएपछि उनलाई पनि अस्पतालबाट डिस्चार्ज गर्ने तयारी भइरहेको छ ।

जिल्ला जनस्वास्थ्य कार्यालय बागलुङका जनस्वास्थ्य अधिकृत सुरज गुरौले यसबारे जानकारी दिदै भने, ‘उहाँ (महिला) को अन्तिम रिपोर्ट पनि नेगेटिभ आएको छ । हामीले सुरक्षित तरिकाले घरमा बस्नेबारे भनेका छौं । अब डिस्चार्ज पनि हुँदै छ ।’

उनी गत चैत २० गते संक्रमण पुष्टि भएपछि धौलागिरि अञ्चल अस्पतालमा भर्ना भएकी थिइन् ।

उनी पनि चैत ४ गते बेल्जियमबाट कतार एयरको क्युआर ६५२ को फ्लाइटबाट नेपाल आएकी थिइन् । 

उनी जस्तै सोही दिन एउटै विमानबाट नेपाल आएका अन्य ३ मा पनि कोरोना संक्रमण देखिएको थियो ।

तीमध्ये काठमाडौं घर भएकी १९ वर्षे युवती शनिबार डिस्चार्ज भएकी छन् भने थप ३ जना उपचारमै छन् । 

बागलुङकी अर्की युवती भने धौलागिरि अस्पतालमै उपचाररत रहेको अस्पताल स्रोतले बताएको छ । 

उनको अवस्था सामान्य नै छ । 

 

०००

दोस्रो कोरोना संक्रमित युवती कोरोना मुक्तः २७ दिनपछि फर्किइन घर

 

प्रकाशित: २०७७ बैशाख ६