निर्माण सञ्चार, ९ वैशाख ०७७, काठमाडौं । आप्रवासी विरुद्धकै नाराका कारण चुनाव जितेका भनिएका अमेरिकी राष्ट्रपति डोनाल्ड ट्रम्पले कोराना भाइरस महामारीबाट सिर्जित परिस्थितिलाई आफ्नो अजेन्डा पूरा गर्ने मौकाका रुपमा प्रयोग गर्ने भएका छन् ।

राष्ट्रपति ट्रम्पले आप्रवासीलाई अमेरिका आउन रोक्ने कार्यकारी आदेशमा हस्ताक्षर गर्ने तयारी गरिरहेका छन् । 

• कोरोना प्रभाव

सोमबार राति आफ्नै ट्विटरबाट आफ्नो योजना सार्वजनिक गर्दै ट्रम्पले कोरोना महामारीपछि ‘अमेरिकी नागरिको जागिर जोगाउन आफूले आप्रवासीलाई अस्थायी रूपमा अमेरिका प्रवेशमा रोक लगाउने आदेश जारी गर्न लागेको’ उल्लेख गरेका छन् ।

उनले लेखेका छन्, ‘अदृश्य शत्रुको आक्रमण र  हाम्रा महान अमेरिकी नागरिकको रोजगारी जोगाउन म आप्रवासीलाई केही समयका लागि अमेरिका प्रवेशमा रोक लगाउने कार्यकारी आदेशमा हस्ताक्षर गर्दैछु ।’

अमेरिकी सञ्चार माध्यमहरुले समेत ट्रम्प प्रशासनले स्वास्थ्यको मुद्दालाई देखाएर अमेरिका प्रवेश गर्न चाहने शरणार्थी र अन्य प्रयोजनले अमेरिका आउन चाहनेहरुलाई रोक्ने कदम चाल्ने बताइरहेका छन् । 

ट्रम्प आफ्नो चुनावी अजेन्डा यही मौकामा कार्यान्वयन गर्ने सोचमा रहेको ह्वाइटहाउसलाई उद्धृत गर्दै अमेरिकी समाचार एजेन्सीहरुले पनि लेखेका छन् । ह्वाइटहाउसका अधिकारीहरु पनि अमेरिका छिर्ने कुनै पनि  कागजातविहीनहरूलाई रोक्ने कदम ठिक हुने भन्दै समर्थनमा देखिएका छन् ।

यसको मतलब हो कि अमेरिका अब केही दिनमै नयाँ ग्रिनकार्डधारी र कामदारलाई भिसा दिनेको प्रावधान रोक्ने छ ।

कोरोना संक्रमण बढेसँगै इयुलाई समेत नपुछेका ट्रम्पको पछिल्ला आफ्ना कदमबाट उनी अमेरिकालाई बाँकी विश्वबाट अलग्याउन चाहन्छन् भन्ने देखिन्छ।

यदि ट्रम्पले नयाँ आदेशमा हस्ताक्षर गरे भने यसले अमेरिकामा काम र बसाइँ सरेर जानेहरुलाई रोक्ने छ ।

आप्रवासीप्रति कठोर नीति लिँदै आएको ट्रम्प प्रशासनले यही आदेशका भरमा यो पक्रियालाई अनिश्चितकालसम्म लब्याउने विज्ञहरुको अनुमान छ ।
आजको विश्वमा अमेरिका नै पछिल्ला दिनमा सबैभन्दा बढी कोरोनाभाइरस महामारीबाट नराम्रोसँग प्रभावित भएको मुलुक बनेको छ।

मंगलबारसम्म अमेरिकामा ७ लाख ९२ हजार मानिस कोरोनाबाट बिरामी छन् भने ४२ हजार ५ सय बढीको कोरोनाकै कारण ज्यान गइसकेको छ ।

०००

प्रकाशित: २०७७ बैशाख ९