नेपालमा कोरोना संक्रमित पुगे ३ हजार ४४८ः विश्वभर कहाँ कतिको मृत्यु ?

निर्माण सञ्चार, २५ जेठ, काठमाडौं । नेपालमा पछिल्लो २४ घण्टामा कोरोना भाइरस (कोभिड–१९) का थप २१३ नयाँ संक्रमित थपिएका छन् ।

योसँगै नेपालमा कोरोना भाइरस संक्रमितको संख्या ३ हजार ४४८ पुगेको छ ।

स्वास्थ्य तथा जनसंख्या मन्त्रालयले आफ्नो नियमित मिडिया ब्रिफिङमा जानकारी दिदै प्रवक्ता विकास देवकोटाले यो आँकडा पुष्टि गरेका हुन् ।

नयाँ संक्रमितहरु मध्ये २ सय ९ जना पुरुष रहेका छन् भने ४ जना महिला रहेका छन् ।

कोरोना जित्नेहरु कति ?

नेपालमा कोरोना भाइरस जितेर उपचार पछि घर फर्कनेहरुको संख्या ४६७ पुगेको छ भने कोरोनाकै कारण मृत्यु हुनेको संख्या १३ पुगेको छ ।

निको हुनेहरुको प्रदेशगत विवरण

प्रदेश १ बाट ९१ जना
प्रदेश २ बाट १८६ जना
वाग्मती प्रदेशबाट ३२ जना
गण्डकी प्रदेशबाट ३ जना
प्रदेश ५ बाट १३३ जना
कर्णाली प्रदेशबाट ९ जना
सुदूरपश्चिम प्रदेशबाट १३ जना रहेका छन् ।

त्यस्तै, निको हुने मध्ये ३९९ पुरुष रहेका छन् भने ६८ जना महिला रहेका छन् । अघिल्लो दिन शुक्रबार मात्रै एकैदिन ४३ जनाले संक्रमितहरुले कोरोना जितेर घर फर्किएका थिए । त्यस्तै शनिबार ३२ जना उपचार पछि निको भएर घर गएका छन् ।

कस्तो छ विश्वभर कोरोना अपडेटः कति पुगे मृत्यु हुने ?

कोरोना भाइरस संक्रमणकै कारण आइतबारसम्म विश्वभर मृत्यु हुनेको संख्या ४ लाख नाघिसकेको छ ।

जोन्स हप्किन्स युनिभर्सिटीले प्रकाशित गरेको तथ्यांक अनुसार विश्वभर कोरोना भाइरसबाट मृत्यु हुनेको संख्या ४ लाख १२१ पुगेको छ ।

अमेरिका नै आजसम्म मृत्यु बढी हुने देशमा दरिएको छ । अमेरिकामा कोरोनाबाट सबैभन्दा बढी १ लाख ९ हजार ८०२ जनाको निधन हुन पुगेको छ ।

त्यसपछि बेलायतमा ४० हजार ५०८ को कोरोना संक्रमणबाट मृत्यु भएको छ । त्यसपछि ब्राजिलमा मृत्यु हुनेको संख्या ३५ हजार ९३० पुगेको छ ।

कोरोना संक्रमितको विश्व आँकडामा पनि अमेरिका नै अघि रहेको छ । अमेरिकामा १९ लाख २० हजार बढी मानिसमा कोरोना भाइरसको संक्रमण देखिएको छ ।

विश्वभर कोरोना भाइरस संक्रमित हुनेको संख्या ६९ लाख नाघेको छ । आइतबारसम्म विश्वभर ६९ लाख १३ हजार ६०८ जना कोरोना भाइरसको संक्रमित पुष्टि भएका छन् ।

संक्रमितको दोस्रो स्थानमा परेको छ ब्राजिल । ब्राजिलमा ६ लाख ७२ हजार बढी मानिस कोरोना भाइरस संक्रमित रहेको छन् भने त्यसपछि रुसमा कोरोना संक्रमितको संख्या ४ लाख ६७ हजार नाघेको छ ।

आजसम्म विश्वभरबाट कोरोना जितेर निको भएकाहरुको संख्या ३० लाख ९५ हजार पुगेको छ ।

०००

सम्बन्धित समाचार