एनआरएन निर्वाचनः अध्यक्ष पन्त सहित यी हुन् बाँकी पदका विजेता (नाम सहित)

निर्माण सञ्चार, १ कात्तिक, ०७६, काठमाडौं । गैरआवसीय नेपाली संघ (एनआरएनए) को नवौं विश्व सम्मेलनबाट अध्यक्षमा कुमार पन्त सहित बाँकी सबै पदका लागि नेतृत्व चयन गरेको छ ।

आउने २ वर्ष कार्यकालका लागि नेतृत्व चयनको काम सम्पन्न भएको निर्वाचन समितिले जनाएको हो ।

शुक्रबार विहान सम्पन्न मतपरिणाम अनुसार अध्यक्षमा कुमार पन्त विजयी भएका छन् । उनले निकटतम प्रत्यासी कूल आचार्यलाई १४७ मतान्तरले पराजित गरेका हुन् ।

पन्तले एक हजार २१७ मत ल्याए भने आचार्यले एक हजार ७० मत ल्याए ।

महिलासहितको ५ उपाध्यक्षमा मिश्रति परिणाम आएको छ । खुलातर्फ पन्त समूहका बद्री केसीले ११६३ मत ल्याएर विजयी बनेका छन् ।

त्यस्तै, अर्जुनकुमार श्रेष्ठले १०२७, सोनाम लामा ८९८ र आचार्य समूहका मन केसीले ९६१ मत ल्याएर विजयी भएका छन् ।

महिला उपाध्यक्षमा पनि आचार्य समूहकै रविना थापा १२२१ मत पाएर विजयी भएकी छन् । प्रतिस्पर्धी पन्त समूहकी सपिला राजभण्डारीले ८६३ मत ल्याउन सकेकी थिइन् ।

त्यस्तै, महासचिवमा पन्त समूहका डा हेमराज शर्मा निर्वाचित भएका छन् ।

यस्तै २ सचिवमा गौरीराज जोशी ९१६ मतले विजयी बने भने आरके शर्मा ८६८ मत पाएर विजेता बन्न सफल भए ।

कोषाध्यक्षमा महेसकुमार श्रेष्ठ १६५३ मत पाएर विजयी बनेका छन् भन् सहकोषाध्यक्षमा लोकप्रसाद दहाल ११८४ मत पाएर जितेका छन् ।

महिला संयोजकमा भोमादेवी लिम्बुले ७०२, युवा संयोजकमा हिमाल गुरुङले ७६८ मत पाएर विजयी बनेका छन् ।

त्यस्तै, मध्यपूर्व र अफ्रिका क्षेत्रका लागि सबै निर्विरोध विजयी बन्न सफल भएका छन् ।

मध्यपूर्व क्षेत्रको संयोजकमा प्रवीन गुरुङ, दुई उपसंयोजकमा मनोजकुमार श्रेष्ठ र राजेन्द्र अर्याल निर्विरोध चयन भएका हुन् ।

महिला संयोजकमा सुमित्रा देवी पौडेर र युवो संयोजकमा राजु रेग्मी पनि निर्विरोध निर्वाचित भएको निर्वाचन समितिले जनाएको छ ।

अफ्रिका क्षेत्रको संयोजकमा रोशन थापा र महिला संयोजकमा मनकला थापा निर्विरोध निर्वाचित भएका छन् ।

क्षेत्रीय उपसंयोजक र युवा संयोजकमा भने उम्मेदवारी नै नपरेको निर्वाचन समितिले जनाएको छ ।

को बन्यो एसिया प्रशान्त क्षेत्रको संयोजक ?

एसिया प्रशान्त क्षेत्रको संयोजकमा गोविन्द श्रेष्ठ विजयी बनेका छन् । उनले २१७ मत पाएर विजयी बनेका हुन् ।
उनले थप २ जना उम्मेदवारलाई पराजित गर्न सफल भए ।

दुई उपक्षेत्रीय संयोजकमा खगेन्द्र न्यौपानेले १९८ र पारसमणि पोखरेलले १९५ मत पाएर विजयी भए ।

महिला संयोजकमा अमृता थापा र युवा संयोजकमा दीपकप्रसाद कंडेल निर्विरोध निर्वाचित बने ।