सनसिटी अपडेटः आरडिटी पोजेटिभ देखिएकी बुहारीको पिसिआर रिपोर्ट आयोः ‘नेगेटिभ’, कामदारहरुको पनि पिसिआर गर्ने तयारी

निर्माण सञ्चार, ३ वैशाख ०७७, काठमाडौं ।

पेप्सीकोलास्थित सनसिटी अपार्टमेन्टमा बस्दै आएका एकै परिवारका ३ मध्ये तेस्रो सदस्य अर्थात् बुहारीको कोरोना भाइरस (कोभिड–१९) संक्रमण रिपोर्ट नेगेटिभ देखिएको छ ।

उक्त अपार्टमेन्टमा एक महिना अघि बेलायतबाट आएका एकै परिवारका ३ सदस्यको गत सोमबार गरिएको र्‍यापिड टेस्टको नतिजा भने एन्टीबडी पोजेटिभ देखिएको थियो । त्यसपछि तत्कालै उनीहरुलाई पाटन अस्पताल भर्ना गरिएको थियो ।

उनीहरुमध्ये मंगलबारको पिसिआर परीक्षणमा ८१ वर्षीया आमा र ५८ वर्षका छोरामा कोरोना संक्रमण पाइएको छ । स्वास्थ्य मन्त्रालयले दिएको जानकारी अनुसार ५२ वर्षकी बुहारीको पछिल्लो रिपोर्ट नेगेटिभ पुष्टि भएको हो । तर, उनको पुनः परीक्षण गरिएको थियो ।

जनस्वास्थ्य विदहरुले उनीमाथि एउटा अनुमान गरेका छन् । र्‍यापिड टेस्टमा उनको रिपोर्ट पोजेटिभ आएको अवस्थामा उनलाई यसअघि नै कोरोना संक्रमण भएको तर अहिले निको भइसकेको हुनसक्ने अनुमान गरेका छन् ।

सनसिटीको उक्त ब्लकमा बुधबार गरिएको र्‍यापिड टेस्टमा भने सबैको नतिजा नेगेटिभ देखिएको छ । बुधबारको परीक्षणमा २९८ जना समावेश थिए ।

यता संक्रमित परिवारमा काम गर्नेहरुको पनि र्‍यापिड टेस्टमा नेगेटिभ नतिजा आएको छ । तर, मन्त्रालयले भने ती कामदारहरुको पनि पिसिआर विधिबाट परीक्षण गर्ने तयारी भइरहेको छ ।

०००

पढौं यो पनि