कोरोनाबाट निधन हुने नवौं व्यक्ति बनेः न्युरो सर्जरी गरिएको दोलखाका ७६ वर्षे बृद्ध

निर्माण सञ्चार, २१ जेठ, काठमाडौं । नेपालमा कोरोना भाइरस (कोभिड–१९) संक्रमणबाट नवौं व्यक्तिको निधन भएको छ ।

दोलखा भीमेश्वर नगरपालिका–२ निवासी ७६ वर्षीय पुरुषको उपचार क्रममा बुधबार निधन भएको हो ।

त्रिभुवन विश्वविद्यालय शिक्षण अस्पतालको गणेशमान भवनको आइसियूमा उपचार क्रममा उनको निधन भएको थियो ।

स्वास्थ्य तथा जनसंख्या मन्त्रालयका अनुसार मृतक जेठ १३ गते ब्रेनमा ह्यामरेज स्ट्रोक भएपछि काठमाडौं मेडिकल कलेज सिनामंगल भर्ना भएका थिए । उनको न्युरो सर्जरी गरिएको थियो ।

कोरोनाको आशंका पनि भएपछि उनको १५ गते कोरोना परीक्षणका लागि स्वाब संकलन गरिएको थियो । परीक्षणपछि उनको रिपोर्ट पोजेटिभ आएको स्वास्थ्य मन्त्रालयले जनाएको हो ।

उपचार क्रममा उनलाई सिनामंगल केएमसीबाट त्रिवि शिक्षण अस्पतालमा सारिएको थियो ।

यो मृत्युसँगै नेपालमा कोरोना संक्रमणबाट मृत्यु हुने संख्या ९ पुगेको छ ।

नेपालमा आजका दिनसम्म २३०० जनामा कोरोना संक्रमण पुष्टि भएको छ भने यस अघि एक महिला सहित ८ जनाको मृत्यु भइसकेको छ ।

कोरोना ६४ जिल्लामा संक्रमित भइसकेको छ ।

०००

सम्बन्धित समाचार