कैलाली र रौतहटको नयाँ संक्रमित भेटिएसँगै नेपालमा कोरोना संक्रमितको संख्या पुग्यो १४: विश्वमा कस्तो छ अवस्था ?

निर्माण सञ्चार, १ वैशाख, ०७७, काठमाडौं । रौतहट जिल्लामा कोरोनाभाइरसबाट संक्रमित नयाँ बिरामी भेटिएका छन् । सो जिल्लामा क्वारेन्टाइनमा बस्दै आएका १९ वर्षीय एक पुरुषमा कोरोना भाइरसको संक्रमण देखिएको स्वास्थ्य तथा जनासंख्या मन्त्रालयले पुष्टि गरको हो ।

यस अघि कैलालीको लम्की चुहामा ६५ वर्षीया बृद्धामा कोरोना भाइरस (कोभिड १९) को संक्रमण भेटिएको थियो ।

यो सँगै नेपालमा कोरोना संक्रमितको संख्या १४ पुगेको छ ।

हालसम्म कैलाली जिल्लामा ४, पर्सा जिल्लामा ३, काठमाडौंमा ३, बाग्लुङमा २ तथा रौतहट र कञ्चनपुरमा १–१ जना कोरोनाभाइरस संक्रमित फेला परेका हुन् ।

यसमध्ये काठमाडौंमा रहेका एक जना संक्रमित निको भएर घर फर्किसकेका छन् ।

पेप्सिकोलास्थित सनसिटी अपार्टमेन्टमा आजै भेटिएका एकै परिवारका ३ जनामा गरिएको आशंका पुष्टि भएमा नेपालमा कोरोना संक्रमितको संख्या बढ्ने निश्चित छ ।

अहिलेसम्म ११ हजारको नमूना परीक्षण

पछिल्ला दिनमा तीव्र गतिमा नमूना परीक्षण अघि बढाइरहेको सरकारले अहिलेसम्म देशभरिमा गरी झन्डै ११ हजार जनाको कोरोना (कोभिड–१९) भाइरस परीक्षण गरिसकेको जनाएको छ ।

स्वास्थ्य तथा जनसंख्या मन्त्रालयका प्रवक्ता डा विकास देवकोटाले यसबारे सोमबार मन्त्रालयमा गरिएको सञ्चार साक्षात्कारमा जानकारी दिएका हुन् ।

उनका अनुसार, सोमबारसम्म १० हजार ९८२ वटा नमूना परीक्षण गरिएको छ ।

मन्त्रालयले ५ हजार ६ सय ९१ जनाको पिसिआर र ५ हजार २ सय ९१ जनाको र्‍यापिड किट विधिबाट परीक्षण गरिएको हो ।

५२ जिल्लामा र्‍यापिड किटबाट परीक्षण सुरु

र्‍यापिड किटबाट ५२ जिल्लामा परीक्षण सुरु भएको प्रवक्ता देवकोटाले जानकारी दिए ।

यतिबेला यी किट सातै प्रदेशमा ५ हजारका दरले वितरण गरिएको छ ।

आजसम्म परीक्षण गरिएमध्ये १४ जनामा संक्रमण पुष्टि भएको छ । यस अघि रौतहटमा १९ वर्षीय पुरुषमा कोरोना देखिएको छ ।

उनी क्वारेन्टाइनमै थिए ।

आजका दिनसम्म काठमाडौं उपत्यकामा ९ सहित देशभरि १ सय ३ जना आइसोलेसनमा छन् ।

काठमाडौंस्थित पेप्सिकोलामा रहेको सनसिटी हाउजिङको केस थपिएपछि काठमाडौंभित्र लुकी बसेका कोरोना संक्रमितहरुको संख्या बढ्न सक्ने आशंका र त्रास दुवै बढेको छ ।

विश्वभर कोरोनाबाट मृत्यु हुने १ लाख १४ हजार बढी पुग्यो

सोमबारसम्मको विश्वमहामारीको डाटा हेर्दा कोरोना भाइरस (कोभिड–१९) बाट मृत्यु हुनेको संख्या एक लाख १४ हजार नाघेको छ ।

जोन्स हप्किन्स युनिभर्सिटीको तथ्यांक अनुसार, विश्वभर कोरोना भाइरसबाट मृत्यु हुनेको संख्या एक लाख १४ हजार दुई सय ४५ पुगेको हो ।

त्यस्तै, यो भाइरसबाट विश्वभर १८ लाख ५० हजारभन्दा धेरै मानिस प्रभावित भइसकेका छन् ।

पछिल्ला दिनमा कोरोना भाइरसबाट सबैभन्दा बढी प्रभावित बनेको छ विश्वकै महाशक्ति भनेर चिनिएको अमेरिका । तर, यो कोरोना भाइरससँगको लडाइँमा सबैभन्दा निम्छरो र होश उडेको देशका रुपमा पनि अमेरिका नै हुन पुगेको छ ।

यस देशमा कोरोना भाइरसका संक्रमितको संख्या ५ लाख ५७ हजार नाघेको छ भने मृत्यु हुनेको संख्या पनि २२ हजार एक सय ८ पुगेको छ ।

छिमेकी भारतमा कति ?

मित्रराष्ट्र भारतमा कोरोना भाइरस संक्रमितको संख्या ९ हजार नाघेको छ ।

भारतको स्वास्थ्य मन्त्रालयले सार्वजनिक गरेको तथ्यांक अनुसार अहिलेसम्म भारतमा कोरोना संक्रमितको संख्या ९ हजार १ सय ५२ पुगेको छ भने यो भाइरसबाट मृत्यु हुनेको संख्या पनि ३ सय ८ पुगेको छ ।

भारतमा पछिल्लो २४ घण्टामा कोरोना भाइरसबाट ३५ जनाको मृत्यु भएको हो ।

त्यस्तै, चीनको वुहान, जहाँबाट यो महामारी सुरु भयो, जहाँ सबैभन्दा पहिला नै लकडाउन हटाइयो, एक हप्ता शून्य अवस्थामा रहेको कोरोना संक्रमण गएको दिन एकाएक एक सय बढीमा पुनः संक्रमण देखिएको छ । संक्रमण देखिए पनि मृत्यु भने कसैको भएको छैन ।

०००

हेरौं स्वास्थ्यमन्त्रालयको भिडियो कन्फरेन्स

https://www.facebook.com/mohpnep/videos/593279734608192/?__xts__[0]=68.ARDJSR2y0OpO-t0l1BY5oJrk-UGy2NIfDm3WNpFkYpUSQZVnAR0LPFA--bz7yEWov4GV2y2gTHmjJp_I7zuvIzxBlLNL2WsJie-6uWzqQ48H3JC7Icu6wKuaRYGhuyTuBi6QkRzAw7CcTgFbSMrvyddaz5Ri-K6z4LUkc3iZhmTy9bT5vY6gRnj-Chp0fK64LSxHU0UJ20pKYZqK3LHIxJZvKUfOxv_bKytmgf0mmsQ-IE6kycErKQGTZP1W5bdhHRF38CI6hUfy8JEXoDUxTVb2mgeepccLCwgmOxefrfgGLe3eRFyqA9HntaM4CFfp0nPu-iPig0NIzAyIF7zipcBg8hhVcc_BFcE&__tn__=-R

०००