भारतबाट आएका थिए कपिलवस्तु मायादेवीका ४ संक्रमितः पुग्यो ३ सय ७९

नर्मिाण सञ्चार, ६ जेठ, काठमाडौं । पछिल्लो अपडेट अनुसार नेपालमा मंगलबार बिहान १०ः३० बजेसम्म ३ सय ७९ जना कोरोना भाइरस संक्रमित फेला परेका छन् ।

कपिलवस्तुमा नयाँ थप ४ जनामा कोरोना संक्रमण पुष्टि भएसँगै यो संख्या पुगेको हो ।

संक्रमित मध्ये कपिलवस्तु मायादेवी गाउँपालिका– ४ का ३ जना (४०, ४२ र ४५ वर्ष उमेरका) र वडा नम्बर– ३ (२० वर्ष उमेरको) का एक जना पुरुषमा कोरोना संक्रमण पुष्टि भएको स्वास्थ्य मन्त्रालयद्वारा पुष्टि गरिएको हो । चारै जना पुरुष नै रहेका छन् ।

प्रमुख जिल्ला अधिकारी दीर्घनारायण पौडेलले जानकारी दिए अनुसार ती संक्रमित केही दिन अघि भारतबाट नेपाल आएका थिए ।

भारतबाट आएपछि स्थानीयहरुबाट जानकारी आएलगत्तै उनीहरूलाई गाउँपलिकाको छत्रपाली क्वारेन्टिनमा राखिएको थियो।

जानकारी अनुसार ती संक्रमितहरु १४ दिनअघि भारतको मुम्बईबाट आएका थिए ।

क्वारेन्टाइनमा उनीहरुको आरडीटी विधिबाट परीक्षण गर्दा पोजेटिभ देखिएको थियो । त्यसपछि भैरहवाको प्रदेश जनस्वास्थ्य प्रयोगशालामा पिसिआर विधिबाट परीक्षण गर्दा पनि कोरोना संक्रमण नै पुष्टि भएको थियो ।

सो क्वारेन्टाइनमा रहेका १६ जनामध्ये ४ जनामा पोजेटिभ देखिएको छ । क्वारेन्टाइनमै बसेकाहरुमा कोरोना संक्रमण नहोस् भन्नका लागि सुरक्षा उपाय अपनाइने जिल्ला अधिकारीहरुको दाबी छ ।

पछिल्ला दिनमा क्वारेन्टाइनमै बसेकाहरुमध्ये पनि कोरोना संक्रमित नभएका संक्रमितबाट संक्रमित बनेको फेला परेको छ । त्यसतर्फ स्थानीय तहका क्वारेन्टाइन व्यवस्थापकहरुको ध्यान कमै गएको देखिन्छ ।

०००

पढौं सम्बन्धित समाचार