जेठ २० गतेसम्म लम्बियो लकडाउनः कोरोना संक्रमित पुगे २९५

निर्माण सञ्चार, ४ जेठ, काठमाडौं । कोरोना संक्रमण तथा रोकथामका लागि भन्दै सरकारले लकडाउन जेठ २० गते मध्यरातसम्म लम्ब्याउने निर्णय गरेको छ ।

मन्त्रिपरिषद्को आइतबार बसेको बैठकले लकडाउन लम्ब्याउने निर्णय गरेको सरकारका प्रवक्ता एवं सञ्चार र अर्थमन्त्री डा युवराज खतिवडाले जानकारी दिएका हुन् ।

सरकारले ११ चैतमा देशभर लकडाउन घोषणा गरेको थियो । त्यसदेखि यता पटकपटक लकडाउनको समय थप भएको छ । पछिल्लो पटक थपिएको समय जेठ ५ सम्मका लागि थियो ।

कोरोना संक्रमित थपिए प्रदेश नम्बर १ मा

पछिल्लो तथ्यांक अनुसार नेपालमा कोरोना संक्रमितको संख्या बढेर २९५ पुगेको छ ।

प्रदेश १ मा आइतबार ३ जनामा कोरोना संक्रमित पुष्टि भएका हुन् । विराटनगरमा दुई जना र धनकुटाका एक जनामा कोरोना देखिएको हो ।

धरानस्थित विपी कोइराला स्वास्थ्य विज्ञान प्रतिष्ठानमा गरिएको परीक्षणमा नयाँ ३ मा कोरोना भाइरसको संक्रमण पुष्टि भएको हो ।

प्रदेश १ का सामाजिक विकासमन्त्री जीवन घिमिरेका अनुसार संक्रमित मध्ये मोरङको विराटनगर निवासी २९ वर्षीया महिला र ३६ वर्षीय पुरुषमा कोरोना देखिएको छ ।

यता धनकुटामा ३४ वर्षीय महिलामा कोरोना देखिको हो । योसँगै प्रदेश १ मा कोरोना संक्रमितको संख्या ३९ पुगेको छ । तीमध्ये १७ जना उपचारपछि निको भई घर फर्किएका छन् ।

योसँगै गरी नेपालमा कोरोना संक्रमित संख्या २९५ पुगेको छ। संक्रमितमध्ये दुई जनाको मृत्यु भएको छ भने ३६ जना निको भएर घर फर्किएका छन् ।

०००

पढौं सम्बन्धित समाचार