लम्बियो लकडाउन ५ जेठसम्मः बिहीबार साँझ घरघरमा दीप प्रज्वलन गर्ने मन्त्रिपरिषदको निर्णय

निर्माण सञ्चार, २४ वैशाख, काठमाडौं । पछिल्लो लडकडाउन भोलि वैशाख २५ गते सकिदै गर्दा सरकारले जेठ ५ सम्म लम्ब्याउने निर्णय गरेको छ।

बुधबार बालुवाटारमा बसेको मन्त्रिपरिषद् बैठकले जेठ ५ सम्म लकडाउन लम्ब्याउने निर्णय गरेको हो ।

कोरोनाभाइरस संक्रमण नियन्त्रण तथा रोकथामका लागि सरकारले गत चैत ११ गतेदेखि बन्दाबन्दीको घोषणा गर्दै आएको थियो ।

तर, बन्दाबन्दीकै बीचमा पनि नेपालमा कोरोनाको संक्रमितको संख्या भने बढिरहेकै छ । ह्वात्तै नबढे पनि बढ्ने क्रम भने रोकिएको छैन ।

नेपालगन्जमा भने मुसलमान समूदायमा देखिएको कोरोना संक्रमणका कारण सरकारले लकडाउन खुकुलो पनि गर्न सकिने भन्ने छलफल रोकेरै जेठ ५ गतेसम्म लकडाउन लम्ब्याउने निर्णय गरेको हो ।

यद्यपि, काठमाडौं उपत्यकामा भने सबै नाकाबाट मानिसहरुको आवातजावत रोकेर व्यावसायिक सहजताका लागि केही खुकुलो पनि गर्न सकिनेबारे सरकारले छलफल अघि बढाएको छ ।

लकडाउनका सुरुका दिनमा (चैत ११ गते) नेपालमा २ जनामा मात्रै कोरोना संक्रमण पुष्टि भएको थियो । तर, करिब डेढ महिनासम्म गरिएको लकडाउनकै अवधिमा पनि आजका दिनसम्म कोरोना संक्रमितको संख्या ८२ जना पुगेको छ ।

बुद्ध जयन्तिका अवसरमा साँझ घरघरमा दीपप्रज्वलन गर्ने सरकारको निर्णय

सरकारले बिहीबार साँझ देशभरि घरघरमा दीप प्रज्वलन गर्ने निर्णय पनि गरेको छ।

बालुवाटारमा बसेको मन्त्रिपरिषद् उक्त बैठकले बुद्ध जयन्तिको अवसर र कोरोनाभाइरसविरूद्ध लडिरहेका स्वास्थ्यकर्मी र सुरक्षाकर्मीको सम्मानमा दीप प्रज्वलन गर्न आह्वान गर्ने निर्णय गरेको हो ।

०००

पढौं सम्बन्धित समाचार