नेपालमा कोरोनाः थपिए ३ संक्रमित, पुगे

नेपालमा कोरोनाः थपिए ३ संक्रमित, पुगे– ४५ः निको भए ७ जना

निर्माण सञ्चार, १० वैशाख, काठमाडौं । नेपालको पछिल्लो कोरोना संक्रमण अपडेट अनुसार बुधबार नयाँ थप ३ संक्रमितसँगै संक्रमितको संख्या ४५ पुगेको छ भने आजसम्म निको भएर घर फर्कनेको संख्या ७ पुगेको छ ।

उदयपुर भुल्केस्थित मस्जिदबाट उपचारका लागि लगिएका व्यक्तिहरुमा नै कोरोना संक्रमण पुष्टि भएको हो । उनीहरु पनि त्रियुगा नगरपालिका–३ भुल्केको नुरी मस्जिदमा बसेको जमाती समूहकै सदस्य रहेका छन् ।

धरानस्थित विपि कोइराला स्वास्थ्य विज्ञान प्रतिष्ठानको प्रयोगशालामा गरिएको पिसिआर परीक्षणबाट उनीहरुमा कोरोना पोजेटिभ पुष्टि भएको स्वास्थ्य मन्त्रालयले जानकारी दिएको हो।

उनीहरु क्रमशः २४ वर्षीय, ६० वर्षीय र ७२ वर्षीय पुरूष रहेका छन् जसमा कोरोना संक्रमण पुष्टि भएको हो ।

यतिबेला तिनै जनालाई भुल्केस्थित उक्त मस्जिदबाट मोरङको टाँडीमा रहेको नेपाली सेनाको क्वारेन्टाइनमा राखिएको छ ।

सोही समूहका मुसलमान समुदायका यी मानिसहरुमा यसअघि नै १६ मध्ये १३ जनामा कोरोना संक्रमण पुष्टि भएको थियो। उनीहरु सबैको उपचार भइरहेको छ ।

योसँगै नेपालमा कोरोना संक्रमित हुनेको संख्या ४५ पुगेको छ । तर, उपचार पछि घर फर्कनेको संख्या भने ७ पुगेको छ ।

थप २ जना निको भएर फर्के घरः कस्तो छ बाँकीको अवस्था ?

बुधबार टेकु अस्पतालमा उपचाररत धादिङका ३४ वर्षीय युवक र सेती अञ्चल अस्पतालमा उपचाररत कञ्चनपुरका ४० वर्षीय पुरुष निको भएर घर फर्किएका छन् ।

स्वास्थ्य मन्त्रालयले दिएको जानकारी अनुसार यी दुवै जनालाई आज डिस्चार्ज गरिएको हो ।

योसँगै कोरानालाई जित्ने नेपालीको सङ्ख्या ७ पुगेको छ । यसअघि ५ संक्रमित निको भएर घर फर्किसकेका छन् ।

निको भएका धादिङका युवक नेपालको तेस्रो संक्रमित हुन्। उनी चैत ६ गते १६० यात्रु बोकेको एयर अरेबियाको उडान नम्बर जी ९५३७ विमानमा नेपाल आएका थिए ।

कोरोना पुष्टि भएपछि उनी चैत १२ गते भर्ना भएका थिए ।

कञ्चनपुरको बेदकोट नगरपालिका ९ सुन्दरपुरका ईन्द्रबहादुर बिक भारतबाट आएका हुन् ।

चैत २१ गते उनको थ्रोट स्वावको नमूना परीक्षण गर्दा पोजेटिभ आएपछि २२ गते उनलाई सुन्दरपुरबाट उपचारका लागि धनगढी ल्याइएको थियो ।

उनीसँगै कैलालीका स्थानीय महिलासहित अन्य २ जनामा पनि कोरोना पुष्टि भएको थियो । त्यसअघि विदेशबाट आएका एकजनामा संक्रमण भएको थियो ।

संक्रमित मध्ये कैलालीको लम्की चुहा नगरपालिकाका २१ वर्षीय राज बिक र धनगढी उपमहानगरपालिका ५ का ३४ वर्षीय अमृत शाहीलाई यसअघि नै अस्पतालले डिस्चार्ज गरिसकेको छ।

अब सुदूरपश्चिमका ४ संक्रमित मध्ये १ जना महिलाको मात्रै उपचाररत छिन् ।

अहिलेसम्म देशभर ४० हजार ४ सय ३१ को परीक्षण गरिएको छ जसमा पिसिआर विधिबाट ९ हजार ११, आरडिटी विधिबाट ३१ हजार ४ सय ३० नमुना परीक्षण गरिएको मन्त्रालयले जानकारी दिएको हो ।

०००

पढौं सम्बन्धित समाचार